Andijon viloyati hokimi Shuhrat Abdurahmonov Xo‘jaobod tumanidagi “Do‘stlik” chegara posti orqali Qirg‘izistondan viloyatga har kuni 100 nafardan 500 nafargacha fuqaro olib o‘tilayotganini, hududdagi kasallanganlarning yarmi shu chegaradan o‘tgan fuqarolar ekanligini ma’lum qildi. Bu haqda Shuhrat Abdurahmonov ishtirokidagi brifingda qatnashgan “Daryo” muxbiri xabar berdi.
Andijon viloyati hokimi 20-iyul kuni viloyat ahliga murojaat qilib, koronavirus dunyo xalqlari qatori o‘zbekistonliklarni ham jiddiy tashvishga solayotganini, ammo kasallikka qarshi tizimli ishlar boshlangani bois, xavotirga o‘rin yo‘qligini, vaziyat to‘liq nazoratga olinganligini bildirgan.
Viloyat hokimining murojaatnomasida hududdagi umumiy kasallanganlarning deyarli yarmi Qirg‘iziston bilan chegaradagi “Do‘stlik” posti orqali o‘tgan O‘zbekiston fuqarolari ekanligi ta’kidlangan.
“Koronavirus balosi O‘zbekistonga kelganidan beri Andijon viloyatida 738 nafar fuqaroda kasallik aniqlandi. Kasallanganlarning 363 nafari ‘Do‘stlik’ chegarasidan o‘tgan turli viloyat fuqarolari ekanligi va bu umumiy kasallanganlar sonining 50 foizini tashkil etishi aniqlangan. Shunga qaramasdan chegarada turgan yurtdoshlarimizning barchasini olib o‘tyapmiz, bundan keyin ham olib o‘tishda davom etamiz. Lekin bir narsani tushunishingizni istardimki, yurtimizga olib kirilayotgan fuqarolarga avvalo sharoitini yaratib, yotoq joyini, dori-darmonini, oziq-ovqatini hal qilganimizdan so‘ng olib o‘tamiz”, — dedi viloyat rahbari.
Viloyat rahbarining ta’kidlashicha, koronavirusdan davolanayotgan 313 nafar bemorning 2 nafari og‘ir, 6 nafari o‘rta og‘ir ahvolda. Qolgan 306 nafarining ahvoli esa qoniqarli.
“Viloyatimizda 2020-yil 16-martdan boshlab shu kunga qadar koronavirus xastaligiga chalinganlarning 425 nafari sog‘aydi. 313 nafari davolanmoqda. Ularning 117 nafari viloyat yuqumli kasalliklar shifoxonasida davolanayotgan bo‘lsa, 196 nafari uy sharoitida belgilangan muolajalarni olmoqda. Shunga muvofiq mobil tibbiyot guruhlari tashkil etilib, xonadonlarga biriktirilgan. Xonadonlar oldida Milliy gvardiya xodimlaridan iborat postlar ham tashkil qilingan”, — deydi Andijon viloyati hokimi.
Ma’lumot uchun, Shuhrat Abdurahmonov 20-iyul kunidagi brifingda Andijon viloyatida koronavirusga chalingan fuqarolar 738 nafar ekanligini bildirgan. Ammo SSVning 20-iyul soat 23:30 dagi jadvali bo‘yicha viloyatda kasallik aniqlangan fuqarolar soni 682 nafarni tashkil etayotganini ko‘rish mumkin.
Andijon viloyatida koronavirusga chalinganlar soni SSV ma’lumotlari bo‘yicha 21-iyulga kelibgina 700 nafardan oshdi. Hozirda kasallik qayd etilganlar soni viloyatda 793 nafarga yetdi.
Eslatib o‘tamiz, Erkinjon Turdimovning 10-iyuldagi murojaatidan so‘ng ham Samarqand viloyatida koronavirus bilan kasallanish holatlari SSV bergan ma’lumotlardan ko‘proqligi ma’lum bo‘lgandi.
Mavzuga doir:
- Shuhrat Abdurahmonov: Andijonda 9 mlrd so‘mlik dori-darmon zaxirasi yaratilgan
- Zoir Mirzayev: “Qashqadaryoda koronavirusdan davolanayotgan 75 nafar bemor 6 ta sektor rahbari nazoratida”
- Buxoroda koronavirusga chalinganlar 633 nafarga, vafot etganlar esa 4 nafarga yetdi
- “Uyda karantinga olinganlarga xizmat ko‘rsatish uchun 354 nafar shifokor, 1454 nafar patronaj hamshira jalb qilingan”. Navoiy viloyati hokimi hududdagi vaziyat haqida xabar berdi
Izoh (0)