O‘zbekiston tashqi ishlar vaziri o‘rinbosari Sherzod Asadov 20-iyul kuni Vena shahrida BMT bosh kotibining o‘rinbosari, BMTning Giyohvand moddalar va jinoyatchilikka qarshi kurash boshqarmasi (BMT GMJQKB) ijrochi direktori Gada Vali, Atom energiyasi bo‘yicha xalqaro agentlik (IAEA) bosh direktori Rafael Grossi va BMT Sanoatni rivojlantirish tashkiloti (UNIDO) bosh direktori Li Yong bilan uchrashuvlar o‘tkazdi. Bu haqda Tashqi ishlar vazirligi axborot xizmati xabar qildi.
Xabarda qayd etilishicha, BMT vakillari O‘zbekistonda ijtimoiy-siyosiy va ijtimoiy-iqtisodiy sohalarda amalga oshirilayotgan keng ko‘lamli o‘zgarishlarga ijobiy baho bergan. Ular kichik va o‘rta biznes hamda sanoat sektorini qo‘llab-quvvatlash, aholi turmush sharoitining yomonlashuviga yo‘l qo‘ymaslik, shuningdek, COVID-19 pandemiyasi davrida jinoyatchilikning oldini olish bo‘yicha olib borilayotgan ishlarni ham muhokama qilgan.
Gada Vali korrupsiyaning oldini olish va unga qarshi kurashish borasidagi O‘zbekiston sa’y-harakatlarini yuqori baholab, Korrupsiyaga qarshi kurashish agentligi tashkil etilganini olqishlagan. Agentlikka har tomonlama yordam berishga tayyorligini bildirgan.
Shuningdek, tomonlar O‘zbekiston va BMT GMJQKB o‘rtasidagi hamkorlikning holati va istiqbollarini muhokama qilgan. BMT GMJQKB rahbari ushbu agentlik va BMT GMJQKB o‘rtasida o‘zaro anglashuv memorandumini imzolashni va hamkorlikning aniq yo‘nalishlarini belgilash va loyihalarni tatbiq etishga donorlik mablag‘larini yo‘naltirish maqsadida xalqaro standartlarga muvofiq respublikada korrupsiyaga qarshi kurash siyosati va strategiyalarini amalga oshirishni qo‘llab-quvvatlash bo‘yicha konseptual qaydnoma tayyorlashni taklif qilgan.
IAEA tomonidan O‘zbekiston yadroviy infratuzilmasini rivojlantirishdagi muvaffaqiyatli hamkorlik, xususan, 2020-yilning dekabr oyida bo‘lib o‘tadigan respublikaning yadroviy infratuzilmasini kompleks baholash bo‘yicha missiyaga birgalikda tayyorgarlik ko‘rish yuqori baholangan.
Agentlik rahbari Rafael Grossi O‘zbekiston yadro dasturining amalga oshirilishi jarayonidan mamnunligini hamda yangi yadro davlatlari uchun O‘zbekiston IAEA bilan munosabatlarni qurish bo‘yicha namuna ekanligini qayd etgan.
Eslatib o‘tamiz, O‘zbekiston delegatsiyasi MAGATE tomonidan 2020-yilning 10—14-fevral kunlari tashkilotning Venadagi bosh qarorgohida o‘tkazilayotgan Fizikaviy yadroviy xavfsizlik bo‘yicha xalqaro anjumanda ishtirok etgan. Fevral oyida O‘zbekiston 2020-yilda MAGATE Yadroviy infratuzilmasini kompleks ko‘rib chiqish bo‘yicha missiyasining o‘tkazilishi yuzasidan so‘rov yuborgani va bu 2020-yilning oktabrida bo‘lib o‘tishi tashkilot tomonidan ma’qullangani xabar qilingandi.
IAEA rahbari texnik kooperatsiya loyihalari doirasida O‘zbekiston bilan, xususan Namangan onkologik dispanseri, Respublika endokrinologiya markazi, Samarqand davlat universiteti va Toshkent shahar onkologiya va radiologiya markazi bilan hamkorlik qilish muhimligini ta’kidlagan.
“UNIDO O‘zbekistonni mintaqadagi ulkan resurs, iqtisodiy va insoniy salohiyatga ega bo‘lgan muhim davlat sifatida ko‘radi. Shu munosabat bilan Li Yong respublikada mustahkam sanoat infratuzilmasi, universal va barqaror sanoatlashtirishni ta’minlash uchun sharoitlar yaratilganligini mamnuniyat bilan qayd etdi.
Bosh direktor koronavirus pandemiyasidan ziyon ko‘rgan respublika iqtisodiyotining ayrim tarmoqlarini tiklash uchun UNIDO salohiyatini jalb qilishga yordam berishga tayyorligini izhor qildi.
Sanoatning “toza innovatsiya” va “yashil” texnologiyalar sohasidagi aniq loyihalarni amalga oshirish bo‘yicha o‘zaro hamkorlikning istiqbollari ko‘rib chiqildi, bu esa barqaror sanoat dizayni va brendlash vositalarini rivojlantirish uchun sharoit yaratishi qayd etildi.
Bundan tashqari, o‘zaro munosabatlarni sifat jihatidan yangi bosqichga olib chiqadigan O‘zbekiston va UNIDO o‘rtasidagi hamkorlikni yanada mustahkamlash bo‘yicha qo‘shma deklaratsiya va 2020—2024-yillarga mo‘ljallangan hamkorlikni yanada rivojlantirish bo‘yicha “Yo‘l xaritasi” loyihalarini tayyorlash jarayoni muhokama qilindi”, – deyiladi TIV xabarida.
Avval O‘zbekiston Respublikasi tashqi ishlar vazirining o‘rinbosari Sherzod Asadov 17-iyul kuni Vena shahrida Yevropada xavfsizlik va hamkorlik tashkiloti bosh kotibi Tomas Greminger va YXHTning doimiy kengashi raisi Igli Hasani bilan uchrashuvlar o‘tkazgani xabar qilingandi.
Izoh (0)