Rossiya poytaxti Moskva shahrida Ikkinchi jahon urushida qozonilgan g‘alabaning 75 yilligi munosabati bilan o‘tkazilgan G‘alaba paradida ishtirok etish uchun tashrif buyurgan Qirg‘iziston delegatsiyasi a’zolari orasida koronavirus aniqlangani sababli, Qirg‘iziston prezidenti So‘ronboy Jeenbekov uch kunda davomida o‘zini izolyatsiya qiladi. Bu haqda Qirg‘iziston prezidenti matbuot xizmatiga tayanib, “Interfaks” xabar berdi.
Ma’lum qilinishicha, prezident va unga hamrohlik qilgan shaxslar Bishkekka qaytadi. Koronavirus tahlili ijobiy natija bergan kishilarga nisbatan belgilangan algoritm to‘liq qo‘llaniladi — ular 14 kun davomida o‘zini izolyatsiya qiladi.
Eslatib o‘tamiz, Moskvaga uchib kelgach, belgilangan talablarga binoan Qirg‘iziston prezidenti, uning delegatsiyasi a’zolari va kuzatuvchilar koronavirusga test topshirgan. Qirg‘iziston prezidenti apparatining tashqi siyosat bo‘limi rahbari Doniyor Sidiqov va qo‘riqlash xizmati xodimining koronavirus testlari ijobiy natija bergan. Shu sababli So‘ronboy Jeenbekov paradda ishtirok etmagan.
Ikkinchi jahon urushida qozonilgan g‘alabaning 75 yilligi munosabati bilan o‘tkazilgan G‘alaba paradi 24-iyun kuni Moskvadagi Qizil maydonda tashkil qilindi. Paradda ishtirok etish uchun 12 ta mamlakat o‘z harbiylarini jo‘natdi. Ular qatoridan Ozarbayjon, Armaniston, Belarus, Qozog‘iston, Qirg‘iziston, Xitoy, Moldova, Mo‘g‘uliston, Serbiya, Tojikiston, Turkmaniston, O‘zbekiston o‘rin olgan.
Avvalroq O‘zbekiston Prezidenti Shavkat Mirziyoyev mazkur paradda ishtirok etib, Toshkentga qaytgani haqida xabar berilgandi.
Ma’lumot uchun, Vladimir Putin Moskvada o‘tgan G‘alaba paradiga barcha MDH davlatlari rahbarlarini taklif qilgan. Ozarbayjon prezidenti Ilhom Aliyev, Armaniston bosh vaziri Nikol Pashinyan mamlakatlaridagi epidemiologik vaziyat tufayli, Turkmaniston prezident Gurbanguli Berdimuhamedov 29-iyunda 63 yosh — Payg‘ambar yoshiga to‘lishi sabab tantanali tadbirlarga bora olmasligini e’lon qilgan. Qozog‘istonning birinchi prezidenti Nursulton Nazarboyev esa koronavirus yuqtirib olgan va u ham Moskvaga bormagan.
Izoh (0)