Xitoy hukumati vakillari bilan aloqada bo‘lgan xitoyliklar Donald Trampni AQSh prezidenti etib qayta saylash kampaniyasi uchun mablag‘ to‘playotgan Trump Victory fondiga yuz minglab dollar miqdorida sarmoya kiritgan. Bu haqda The Wall Street Journal (WSJ) xabar bermoqda.
Nashr ma’lumotlariga ko‘ra, fond hisob raqamiga 2017-yili Xitoyning to‘rt nafar fuqarosidan pul kelib tushgan. Ular sarmoya kiritish yo‘li bilan Respublikachilar partiyasi qurultoyida ishtirok etish uchun taklifnomani qo‘lga kiritishni va kelgusida, ehtimol, unga ta’sir ko‘rsatish maqsadida Tramp bilan yaqinlashishni xohlagan bo‘lishi mumkin, deb yozadi nashr.
WSJ ma’lumotlariga ko‘ra, Trump Victory hisobiga pul o‘tkazganlarning ayrimlari Xitoy davlat xavfsizlik xizmati devoni, xususan, qurolli kuchlarga aloqador tashkilotlar a’zolari bilan yaqin aloqada bo‘lgan. Nashrning yozishicha, bu odamlar xitoylik mashhur siyosiy arboblarni Trampga yaqinlashish borasida muvaffaqiyatga erishayotganliklari haqida xabardor qilgan o‘rinlari ham bo‘lgan.
Maqolada qayd etilishicha, fondga katta mablag‘ni xayriya qilgan xitoyliklarning uch nafari — ular orasida Xitoy markaziy hukumatida ishlovchi shaxs ham bo‘lgan — 2017-yil may oyida Respublikachilar partiyasi Milliy qo‘mitasining Kaliforniya shtatidan vakili bo‘lgan Shon Stil tomonidan AQShda tashkil etilgan yopiq uchrashuvda mehmon bo‘lgan. Unda, ta’kidlanishicha, respublikachilarning saylovoldi kampaniyalarini o‘tkazish, shuningdek, partiyaning boshqa ichki masalalari muhokama qilingan.
Respublikachilar partiyasi Milliy qo‘mitasi WSJ’ning so‘rovlariga javoban, o‘sha uchrashuvdan so‘ng Shon Stilga “siyosatimizni noqonuniy tashqi aralashuvlardan” himoya qilish maqsadida Xitoy fuqarolari bilan aloqalarni to‘xtatish haqida topshiriq berilganini ma’lum qilgan. Qo‘mitaning qayd etishicha, partiya fond hisob raqamiga o‘tkazilgan pullarni qaytarib bermoqchi emas, chunki ular saylovoldi kampaniyalarini moliyalashtirish qoidalariga zid emas.
Maqola mualliflari xitoyliklar tomonidan Trump Victory fondiga pul mablag‘larining o‘tkazilishi bilan bog‘liq qoidabuzarliklarni aniqlay olmagan. Bundan tashqari, WSJ’ning alohida qayd etishicha, Trampning o‘zi bunday xayriyalardan bexabar qolgan bo‘lishi ehtimoli yuqori. Oq uy gazetaning so‘rovlariga javob bermagan.
Izoh (0)