Prezident Shavkat Mirziyoyevning Farg‘ona viloyatiga tashrifi davomida ishdan olingan Toshloq tuman soliqchilari boshlig‘i o‘riniga Bekmirzayev Quyoshbek Xolmatovich tayinlandi. Bu haqda “Daryo” muxbiri xabar berdi.
Quyoshbek Bekmirzayev yangi lavozimga tayinlangunga qadar Farg‘ona viloyati davlat soliq boshqarmasining soliq nizolarini sudgacha hal qilish bo‘limi boshlig‘i lavozimida ishlagan.
Q.Bekmirzayev 1982-yilda Farg‘ona viloyatida tug‘ilgan. 2003-yili Farg‘ona politexnika institutini tamomlagan.
U soliq tizimidagi mehnat faoliyatini 2005-yilda Farg‘ona shahar davlat soliq inspeksiyasida davlat soliq inspektori lavozimida boshlagan. Hozirga qadar Farg‘ona viloyati davlat soliq boshqarmasi, shuningdek, Farg‘ona shahri va Quva tumani davlat soliq inspeksiyalarida turli lavozimlarda ishlagan.
Ta’kidlash lozim, Prezident Shavkat Mirziyoyev raisligida joriy yil 6-iyun kuni Farg‘ona shahrida bo‘lib o‘tgan faollar yig‘ilishida faoliyatida sustkashlikka yo‘l qo‘ygan Toshloq tumani hokimi va soliq inspeksiyasi boshlig‘ini vazifasidan ozod etish bo‘yicha ko‘rsatma berilgandi.
Avvalroq paxta-to‘qimachilik klasteri rahbari Abduqahhor Jo‘raboyev Toshloq tumanining yangi hokimi etib tayinlangani haqida xabar berilgan edi.
Izoh (0)