Namangan viloyatining To‘raqo‘rg‘on tumanida 70 yoshni qoralagan otaxon mahalla idorasi uchun shaxsiy mulki bo‘lgan binoning 5 ta xonasini xatlab berdi. Bu haqda “Daryo” muxbiri Azizbek Abduvaliyev xabar bermoqda.
Muslimxo‘ja Qosimov o‘zi 13 yil davomida “Sohilobod” mahallasini boshqargan. Asli duradgor usta bo‘lgan otaxon hozirda keksalik gashtini surmoqda.
— Bu joy sobiq “Sohibkor” jamoa xo‘jaligining binosi bo‘lgan. Suv xo‘jaligi tashkiloti balansiga o‘tkazib berilgan bino 2018-yilda tashkilotning qarzi tufayli sotuvga qo‘yilgandi. Uni tadbirkorlik bilan shug‘ullanish maqsadida 54 million so‘mga sotib olgandim. Mahallaga nafim tegsin deb, qolaversa, o‘zim ishlagan dargoh bo‘lgani uchun 5 ta xonani MFY uchun o‘tkazib berdim. Qolgan 4 xonada mebel sexi ochishni rejalab turibman, — deydi Muslimxo‘ja Qosimov.
“Sohilobod”ning hozirgi raisi Nazokat Baratovaning aytishicha, 2,5 mingga yaqin aholi istiqomat qiladigan va asosan uzum yetishtirish bilan shug‘ullanadigan mahalla uchun bu tashabbus ayni muddao bo‘ladi. Hozirda mahalla ahli birlashib, idora tomini yangilash ishlari bilan band. Buning uchun fuqarolar sa’y-harakati bilan 15 million so‘mga yaqin mablag‘ yig‘ildi.
— Mahallamiz binosini zamonaviy qiyofaga keltirish uchun har bir sohilobodlik hissa qo‘shyapti desam mubolag‘a emas. Hozirgi qiyin sharoitiga qarab o‘tirmasdan hashar va ehsonlar uyushtirilyapti. Kimdir pul bergan, yana kimdir qurilish ashyolari olib kelgan, ustalardan xabar olib turishibdi. “Bir xayrli ish boshqalarini yetaklaydi” deganlari bejiz emas, — deydi Nazokat Baratova.
Izoh (0)