Toshkent shahar hokimligi ekologik xizmatlar borasida yetakchi tashkilot – Fransiyaning SUEZ kompaniyasi bilan hamkorlik boshlanganligi haqida xabar berdi.
Qayd etilishicha, bu haqda Toshkent shahar hokimi Jahongir Ortiqxo‘jayev, SUEZ’ning Yaqin Sharq, Markaziy Osiyo va Kavkaz hududi bo‘yicha bosh direktori Siril Kurjaret va uy-joy kommunal xizmat ko‘rsatish vaziri Muzaffar Soliyev tomonidan 7-mart kuni tegishli shartnoma imzolangan. Unga muvofiq, “Toshkent suv ta’minoti transformatsiyasining rejasi” nomli 7 yillik istiqbolli va innovatsion loyiha amalga oshiriladi.
Toshkent shahar hokimi o‘rinbosari Baxtiyor Raxmonqulovning ta’kidlashicha, loyihaning umumiy budjeti 185,4 million yevroni tashkil qiladi. Shundan 142 million yevro Yevropaning yetakchi banklari kreditlari hisobidan o‘zlashtiriladi. Mablag‘lar shahar suv ta’minoti va oqava suv tarmoqlarini modernizatsiya qilish va ularning boshqaruvini eng yuqori xalqaro standartlarga muvofiq takomillashtirishga yo‘naltiriladi.
Loyiha SUEZ’ning 80 dan ortiq mamlakatdagi 150-yillik tajribasiga tayangan holda SUEZ tomonidan intellektual boshqaruv bo‘yicha eng ilg‘or texnologiyalarni joriy qilish va nou-xaularni tatbiq etishni o‘z ichiga oladi.
“Ushbu ijtimoiy loyiha davlatimizning ilg‘or xorijiy tajriba ko‘magida barcha fuqarolar uchun kommunal xizmatlarni yangilash va kengaytirishga bo‘lgan yondashuviga to‘liq muvofiq keladi. Bu O‘zbekistondagi suv ta’minoti sektorining modernizatsiya qilish bo‘yicha ilk loyiha bo‘lib, butun Markaziy Osiyo mintaqasi uchun namuna bo‘ladi”, — deydi u.
Shuningdek, ta’kidlashicha, Toshkent suv ta’minoti transformatsiyasining loyihasi mahalliy iqtisodiyotga ham salmoqli hissa qo‘shadi. Uskunalarni ishlab chiqarishning bir qismi Toshkentda joylashtirilishi yangi ish o‘rinlarini yaratishga ko‘mak beradi hamda suv ta’minoti bo‘yicha yuzlab mahalliy mutaxassislar Toshkentda va xorijda o‘qitiladi.
Hozirgi kunda texnik topshiriqning kelishilgan loyihasi uning texnik-iqtisodiy asoslanishi uchun Uy-joy kommunal xo‘jaligi vazirligining Tarmoq ilmiy-texnik kengashi tomonidan ko‘rib chiqilmoqda.
Izoh (0)