Президент Шавкат Мирзиёевнинг Фарғона вилоятига ташрифи давомида ишдан олинган Тошлоқ туман солиқчилари бошлиғи ўринига Бекмирзаев Қуёшбек Холматович тайинланди. Бу ҳақда «Дарё» мухбири хабар берди.
Қуёшбек Бекмирзаев янги лавозимга тайинлангунга қадар Фарғона вилояти давлат солиқ бошқармасининг солиқ низоларини судгача ҳал қилиш бўлими бошлиғи лавозимида ишлаган.
Қ.Бекмирзаев 1982 йилда Фарғона вилоятида туғилган. 2003 йили Фарғона политехника институтини тамомлаган.
У солиқ тизимидаги меҳнат фаолиятини 2005 йилда Фарғона шаҳар давлат солиқ инспекциясида давлат солиқ инспектори лавозимида бошлаган. Ҳозирга қадар Фарғона вилояти давлат солиқ бошқармаси, шунингдек, Фарғона шаҳри ва Қува тумани давлат солиқ инспекцияларида турли лавозимларда ишлаган.
Таъкидлаш лозим, Президент Шавкат Мирзиёев раислигида жорий йил 6 июнь куни Фарғона шаҳрида бўлиб ўтган фаоллар йиғилишида фаолиятида сусткашликка йўл қўйган Тошлоқ тумани ҳокими ва солиқ инспекцияси бошлиғини вазифасидан озод этиш бўйича кўрсатма берилганди.
Аввалроқ пахта-тўқимачилик кластери раҳбари Абдуқаҳҳор Жўрабоев Тошлоқ туманининг янги ҳокими этиб тайинлангани ҳақида хабар берилган эди.
Изоҳ (0)