Sog‘liqni saqlash vazirligi Samarqandda 34 kishiga koronavirus infeksiyasi yuqishiga sababchi bo‘lganligi gumon qilingan X.D.ga nisbatan ochilgan jinoyat ishi bekor qilingani haqida xabar berdi.
X.D.ga nisbatan jinoyat ishi qo‘zg‘atish to‘g‘risidagi qaror asossiz, deb hisoblab, vazir Alisher Shodmonov O‘zbekiston Respublikasi bosh prokuroriga shifokorga nisbatan jinoyat ishi qo‘zg‘atish to‘g‘risidagi qarorni bekor qilish masalasining ko‘rib chiqilishini so‘rab murojaat yo‘llagan.
Ushbu murojaat yuzasidan Bosh prokuraturadan javob xati olindi. Unda qayd etilishicha, Bosh prokuratura mazkur jinoyat ishini o‘rganish jarayonida X.D.ga nisbatan to‘plangan hujjatlar bo‘yicha olib borilgan tergovga qadar tekshiruv harakatlari har tomonlama, sinchkovlik bilan o‘tkazilmasdan, barcha holatlar to‘liq tekshirilmasdan, shoshma-shosharlik bilan barvaqt jinoyat ishi qo‘zg‘atish to‘g‘risida qaror qabul qilinganligini aniqlagan.
Shunga ko‘ra, Samarqand viloyat Ichki ishlar boshqarmasi huzuridagi Tergov boshqarmasi tomonidan X.D.ga nisbatan Jinoyat kodeksining 257-1-moddasi 1-qismi (Sanitariyaga oid qonun hujjatlarini yoki epidemiyaga qarshi kurash qoidalarini buzish) bilan jinoyat ishi qo‘zg‘atish haqidagi qaror Bosh prokuratura tomonidan bekor qilingan.
Avval X.D.ning doimiy muloqotda bo‘lgan turmush o‘rtog‘i va boshqa qarindoshlari, o‘zi davolagan bemor va hamkasblaridan 11 nafariga, ular orqali yana 23 kishiga COVID-19 infeksiyasining yuqishiga sabab bo‘lgani xabar qilingandi.
Izoh (0)