Соғлиқни сақлаш вазирлиги Самарқандда 34 кишига коронавирус инфекцияси юқишига сабабчи бўлганлиги гумон қилинган Х.Д.га нисбатан очилган жиноят иши бекор қилингани ҳақида хабар берди.
Х.Д.га нисбатан жиноят иши қўзғатиш тўғрисидаги қарор асоссиз, деб ҳисоблаб, вазир Алишер Шодмонов Ўзбекистон Республикаси бош прокурорига шифокорга нисбатан жиноят иши қўзғатиш тўғрисидаги қарорни бекор қилиш масаласининг кўриб чиқилишини сўраб мурожаат йўллаган.
Ушбу мурожаат юзасидан Бош прокуратурадан жавоб хати олинди. Унда қайд этилишича, Бош прокуратура мазкур жиноят ишини ўрганиш жараёнида Х.Д.га нисбатан тўпланган ҳужжатлар бўйича олиб борилган терговга қадар текширув ҳаракатлари ҳар томонлама, синчковлик билан ўтказилмасдан, барча ҳолатлар тўлиқ текширилмасдан, шошма-шошарлик билан барвақт жиноят иши қўзғатиш тўғрисида қарор қабул қилинганлигини аниқлаган.
Шунга кўра, Самарқанд вилоят Ички ишлар бошқармаси ҳузуридаги Тергов бошқармаси томонидан Х.Д.га нисбатан Жиноят кодексининг 257-1-моддаси 1-қисми (Санитарияга оид қонун ҳужжатларини ёки эпидемияга қарши кураш қоидаларини бузиш) билан жиноят иши қўзғатиш ҳақидаги қарор Бош прокуратура томонидан бекор қилинган.
Аввал Х.Д.нинг доимий мулоқотда бўлган турмуш ўртоғи ва бошқа қариндошлари, ўзи даволаган бемор ва ҳамкасбларидан 11 нафарига, улар орқали яна 23 кишига COVID-19 инфекциясининг юқишига сабаб бўлгани хабар қилинганди.
Изоҳ (0)