Ijtimoiy tarmoqlarda 29-aprel, chorshanba kuni, Toshkent viloyati Yangiyo‘l tumanining “Bunyodkor” mahallasidagi noqonuniy inshootlar buzilishi yuzasidan ularning egalari hamda aholi vakillari tomonidan yuborilgan norozilik mazmunidagi murojaatlar keng muhokama qilinmoqda. Toshkent viloyati hokimligi ana shu noqonuniy qurilmalarning buzilishi yuzasidan ma’lumot berdi.
Ta’kidlanishicha, qishloq xo‘jaligida foydalaniladigan yerlarning noqonuniy o‘zlashtirilishi, ya’ni uy-joy qurish va boshqa maqsadlarda egallanishiga qarshi nazorat tadbirlari boshlangan.
“Xususan, Yangiyo‘l tumanida ham bu tadbirlar joriy yil davomida muntazam o‘tkazib kelinmoqda. Bu huquqbuzarliklar haqida ‘O‘zbekiston 24’ telekanalida maxsus reportaj efirga uzatilgan”, — deyiladi hokimlik munosabatida.
Hokimlik tomonida ma’lum qilinishicha, Yangiyo‘l tumani “Bunyodkor” mahallasida yashovchi 48 nafar fuqaro tomonidan 2019-yil fevral-aprel oylarida qishloq xo‘jaligi uchun mo‘ljallangan 7,07 gektar maydondagi yuqori unumdor yerlarga o‘zboshimchalik bilan bir xonali noqonuniy inshootlar qurib olingan.
Buzib tashlangan 13 ta qurilma joylashgan yer yuqori bonitetli, ekin maydonlari uchun mo‘ljallangan, tuman zaxirasida turgan maydon hisoblanadi. Hokimlikning qayd etishicha, bu inshootlarda fuqarolar istiqomat qilmaydi. Hammasi yaqinda solingan imoratlar hisoblanadi.
Prokuratura tomonidan berilgan ma’lumotga ko‘ra, ushbu qurilishi bitmagan imoratga kadastr yig‘ma jildini rasmiylashtirish maqsadida fuqarolar mahalla raisi K.Rixsiyevdan go‘yoki ular yer maydoniga 2005-yildan buyon egalik qilishi to‘g‘risida mulk huquqini e’tirof etishga sabab bo‘ladigan soxta ma’lumotlarni olgan hamda tuman davlat xizmatlar markaziga taqdim etgan.
Hokimlikning qayd etishicha, Yer tuzish va ko‘chmas mulk kadastr davlat korxonasi xodimlari ushbu imoratlarga noqonuniy ravishda kadastr hujjatlarini rasmiylashtirib bergan.
“Mutaxassislar xulosasiga ko‘ra, yuqori unumdor yerlar egallanib, o‘zboshimchalik bilan qurilmalar qurilishi oqibatida qishloq xo‘jaligida foydalanish uchun yaroqsiz holatga kelgan va meliorativ holatini yo‘qotgan”, — deyiladi hokimlik xabarida.
Mazkur qurilishi bitmagan imoratlar O‘zbekiston Respublikasining Yer to‘g‘risidagi qonunlari va qonunosti hujjatlari talablariga zid ravishda qurilgan bo‘lsa-da, kadastr hujjatlari rasmiylashtirib berilganligi holati yuzasidan O‘zbekiston Respublikasi Jinoyat kodeksining 228-moddasi va boshqa tegishli moddalari bilan jinoyat ishi qo‘zg‘atilib, Yangiyo‘l tuman IIB tomonidan tergov harakatlari olib borilmoqda.
Toshkent viloyati hokimligining bildirishicha, yuqorida qayd etilgan noqonuniy qurilmalarni buzish bo‘yicha ogohlantirish xatlari berilgan, berilgan muddatlar o‘tib ketgan bo‘lsa-da, fuqarolar tomonidan imoratlar ixtiyoriy ravishda buzilmagan.
Ma’lum qilinishicha, holat yuzasidan Toshkent viloyati hokimligi axborot xizmati va huquq-tartibot idoralari hamkorligida batafsil axborot tayyorlanmoqda.
Izoh (0)