Sog‘liqni saqlash vazirligi O‘zbekistonda koronavirusga chalingan bemorlar hamda kasallikdan tuzalganlar yuzasidan infografika tarzida qo‘shimcha ma’lumotlar berdi.
Infografikaga ko‘ra, O‘zbekistonda koronavirusni yuqtirib olgan 1969 nafar bemordan 1066 nafari, ya’ni 53 foizi kasallikdan tuzalgan.
Hududlar kesimida Qoraqalpog‘iston Respublikasida 109 kishida koronavirus qayd etilgan, shundan 62 nafari (57 foiz) infeksiyadan tuzalgan. Andijonda esa 154 nafar kasallangan bemordan 88 nafari (57 foiz) sog‘aygan.
Koronavirusni yuqtirib olish bo‘yicha eng ko‘p — 615 ta holat Toshkent shahrida kuzatilgan. Shahardagi bemorlarning 52 foizi, ya’ni 320 nafari COVID-19’dan tuzalgan. Keyingi o‘rinlarni Buxoro (395 bemorning 300 nafari, ya’ni 76 foizi tuzalgan) hamda Xorazm viloyatlari (223 bemorning 121 nafari, ya’ni 54 foizi sog‘aygan) egallab turibdi. Qashqadaryo viloyatida koronavirus bilan kasallanganlar 6 nafarni tashkil etadi: shundan 5 nafari (83 foizi) kasallikdan tuzalgan. Avval Jizzaxda koronavirus bilan kasallanganlarning barchasi sog‘aygani ma’lum qilingandi.
Kasallikdan vafot etganlar ko‘rsatkichi bo‘yicha ham Toshkent shahri yetakchi — 4 nafar bemor hayotdan ko‘z yumgan. Namangan viloyatida 3 kishi, Farg‘ona viloyatida 1 nafar bemor koronavirus oqibatida vafot etgan.
Jadvalga ko‘ra, kasallikdan tuzalish ko‘rsatkichi hozircha Samarqand (17 foiz), Sirdaryo (21 foiz) va Namangan viloyatlarida (36 foiz) nisbatan sustroq ekani ma’lum bo‘lmoqda.
Avval O‘zbekistonda 29-aprel soat 15:30 holatiga ko‘ra, koronavirus infeksiyasini yuqtirib olganlar soni 14 kishiga ko‘payib, 1969 nafarga yetgani, 29-aprel soat 16:10 holatiga ko‘ra, 74 nafar bemor tuzalib, O‘zbekistonda COVID-19 koronavirus infeksiyasidan butunlay sog‘ayganlar 1066 nafarni tashkil qilgani haqida xabar berilgandi. O‘zbekistonda 15-martdan buyon koronavirusga chalingan bemorlarning sakkiz nafari vafot etgan.
Izoh (0)