Ижтимоий тармоқларда 29 апрель, чоршанба куни, Тошкент вилояти Янгийўл туманининг «Бунёдкор» маҳалласидаги ноқонуний иншоотлар бузилиши юзасидан уларнинг эгалари ҳамда аҳоли вакиллари томонидан юборилган норозилик мазмунидаги мурожаатлар кенг муҳокама қилинмоқда. Тошкент вилояти ҳокимлиги ана шу ноқонуний қурилмаларнинг бузилиши юзасидан маълумот берди.
Таъкидланишича, қишлоқ хўжалигида фойдаланиладиган ерларнинг ноқонуний ўзлаштирилиши, яъни уй-жой қуриш ва бошқа мақсадларда эгалланишига қарши назорат тадбирлари бошланган.
«Хусусан, Янгийўл туманида ҳам бу тадбирлар жорий йил давомида мунтазам ўтказиб келинмоқда. Бу ҳуқуқбузарликлар ҳақида ‘Ўзбекистон 24’ телеканалида махсус репортаж эфирга узатилган», — дейилади ҳокимлик муносабатида.
Ҳокимлик томонида маълум қилинишича, Янгийўл тумани «Бунёдкор» маҳалласида яшовчи 48 нафар фуқаро томонидан 2019 йил февраль апрель ойларида қишлоқ хўжалиги учун мўлжалланган 7,07 гектар майдондаги юқори унумдор ерларга ўзбошимчалик билан бир хонали ноқонуний иншоотлар қуриб олинган.
Бузиб ташланган 13 та қурилма жойлашган ер юқори бонитетли, экин майдонлари учун мўлжалланган, туман захирасида турган майдон ҳисобланади. Ҳокимликнинг қайд этишича, бу иншоотларда фуқаролар истиқомат қилмайди. Ҳаммаси яқинда солинган иморатлар ҳисобланади.
Прокуратура томонидан берилган маълумотга кўра, ушбу қурилиши битмаган иморатга кадастр йиғма жилдини расмийлаштириш мақсадида фуқаролар маҳалла раиси К.Рихсиевдан гўёки улар ер майдонига 2005 йилдан буён эгалик қилиши тўғрисида мулк ҳуқуқини эътироф этишга сабаб бўладиган сохта маълумотларни олган ҳамда туман давлат хизматлар марказига тақдим этган.
Ҳокимликнинг қайд этишича, Ер тузиш ва кўчмас мулк кадастр давлат корхонаси ходимлари ушбу иморатларга ноқонуний равишда кадастр ҳужжатларини расмийлаштириб берган.
«Мутахассислар хулосасига кўра, юқори унумдор ерлар эгалланиб, ўзбошимчалик билан қурилмалар қурилиши оқибатида қишлоқ хўжалигида фойдаланиш учун яроқсиз ҳолатга келган ва мелиоратив ҳолатини йўқотган», — дейилади ҳокимлик хабарида.
Мазкур қурилиши битмаган иморатлар Ўзбекистон Республикасининг Ер тўғрисидаги қонунлари ва қонуности ҳужжатлари талабларига зид равишда қурилган бўлса-да, кадастр ҳужжатлари расмийлаштириб берилганлиги ҳолати юзасидан Ўзбекистон Республикаси Жиноят кодексининг 228-моддаси ва бошқа тегишли моддалари билан жиноят иши қўзғатилиб, Янгийўл туман ИИБ томонидан тергов ҳаракатлари олиб борилмоқда.
Тошкент вилояти ҳокимлигининг билдиришича, юқорида қайд этилган ноқонуний қурилмаларни бузиш бўйича огоҳлантириш хатлари берилган, берилган муддатлар ўтиб кетган бўлса-да, фуқаролар томонидан иморатлар ихтиёрий равишда бузилмаган.
Маълум қилинишича, ҳолат юзасидан Тошкент вилояти ҳокимлиги ахборот хизмати ва ҳуқуқ-тартибот идоралари ҳамкорлигида батафсил ахборот тайёрланмоқда.
Изоҳ (0)