Farg‘ona viloyati yuqumli kasalliklar shifoxonasida koronavirus infeksiyasiga chalingan 19 nafar bemor sog‘aydi. Sog‘liqni saqlash vazirligidan ma’lum qilishlaricha, sog‘ayganlarning 9 nafari Turkiyadan, 1 nafari Saudiya Arabistonidan kelgan va karantinga olingan, qolgan to‘qqiz kishi koronavirusga chalingan bemorlar bilan muloqotda kasallikni yuqtirib olgan edi.
“Ulardan 11 nafari Farg‘onadan, 3 nafari Toshkent shahridan, 2 nafari Samarqanddan, Jizzax, Sirdaryo va Toshkent viloyatlaridan 1 nafardan. Bemorlarning 10 nafari erkak, 9 nafari ayol bo‘lib, ular orasida uch oylik chaqaloq ham bor. Eng yoshi kattasi 61 yoshda”, — deyiladi vazirlik axborotida. Bungacha Farg‘ona viloyati bo‘yicha 11 nafar bemor sog‘aygan edi.
Shuningdek, Toshkentdagi Epidemiologiya, mikrobiologiya va yuqumli kasalliklar ilmiy-tekshirish instituti klinikasidan koronavirus infeksiyasiga chalingan navbatdagi 10 nafar bemor butkul sog‘aydi. Ulardan 9 nafari koronavirus infeksiyasiga chalingan bemorlar bilan muloqot orqali kasallikni yuqtirib olgan, 1 nafari esa Qozog‘istondan kelgan va karantin markaziga joylashtirilgan edi.
“Ularning 7 nafari Toshkent shahridan, Jizzax, Farg‘ona va Toshkent viloyatidan 1 nafardan. Infeksiya aniqlangach, Epidemiologiya, mikrobiologiya va yuqumli kasalliklar ilmiy-tekshirish instituti klinikasiga yotqizilgan. Bemorlardan 6 nafari erkak, 4 nafari ayollardir. Ular orasida eng yoshi kattasi 55 yoshda bo‘lsa, eng yoshi kichigi 14 yoshda”, — deyiladi vazirlik xabarida. Bungacha ushbu klinikada 58 nafar bemor sog‘aygan edi.
Shunday qilib, O‘zbekiston bo‘ylab koronavirus infeksiyasidan butkul sog‘ayganlar soni 24-aprel soat 13:00 holatiga ko‘ra 592 nafarga yetdi. Eslatib o‘tamiz, 24-aprel soat 10:00 holatiga ko‘ra O‘zbekistonda koronavirus infeksiyasini yuqtirib olish bilan bog‘liq 1778 ta holat aniqlangan, bemorlarning yetti nafari vafot etgan.
Izoh (0)