Samarqandda karantin qoidalarini mensimay mast holatda janjal ko‘targan shaxs 15 sutkaga qamaldi

Spirtli ichimlik ichib, uyida janjal ko‘targan va ko‘chaga chiqib karantin qoidalarini buzgan samarqandlik fuqaro 15 sutkaga qamaldi, deya xabar beradi “Daryo” muxbiri.

Ta’kidlanishicha, 2020-yilning 21-aprel kuni soat 19:30 da bulung‘urlik fuqaro I.A. yashash xonadonida spirtli ichimlik iste’mol qilib, mast bo‘lib qolgan va uyida janjal ko‘targan. Bundan qo‘rqib ketgan qizi E.S. profilaktika inspektorini chaqirgan. Profilaktika inspektorining kelishini eshitgan I.A. esa ko‘chaga qochib chiqqan.

Mast holda karantin qoidalariga zid ravishda ko‘chada niqobsiz yurgan I.A. profilaktika inspektori tomonidan topilib, so‘roq qilinganida IIB xodimlariga qarshilik ko‘rsatib, baqir-chaqir qilib janjal ko‘targan.

Bulung‘ur tuman ma’muriy sudining ma’lum qilishicha, I.A. ilgari ham shunday huquqbuzarliklarni sodir qilgani uchun jazolangan. Ammo tegishli xulosa chiqarmagan.

Sud hukmiga ko‘ra, I.A. Ma’muriy javobgarlik to‘g‘risidagi kodeksning 54-moddasi 1-qismi (Epidemiyalarga qarshi kurash qoidalarini buzish), 183-moddasi (Mayda bezorilik) va 194-moddasi 1- qismi (Ichki ishlar organlari xodimining qonuniy talablarini bajarmaslik) bilan aybli deb topilgan va 15 sutkaga qamalgan.

Shuningdek, Samarqand shahrida karantinda ruxsatnomasiz avtomobil boshqargan va YPX inspektoridan qochgan haydovchi qilmishi uchun 10 sutkaga qamaldi.

Aniqlanishicha, 2020-yilning 21-aprel kuni Samarqand shahri Ibn Sino ko‘chasida o‘tkazilgan reyd tadbirida fuqaro N.A. boshqaruvidagi Spark to‘xtatilganda haydovchida karantin paytida avtomashina boshqarish uchun maxsus ruxsatnomasi yo‘qligi ma’lum bo‘lgan.

Haydovchi mazkur holat haqida ma’muriy bayonnoma tuzmoqchi bo‘lgan YPX inspektori va davlat sanitariya-epidemiologik osoyishtalik markazi xodimining qonuniy talablarini bajarmasdan, ularga qarshilik ko‘rsatib, mashinasida qochib ketgan.

Samarqand shahar ma’muriy sudi raisi Orif Pardayevning “Daryo”ga ma’lum qilishicha, huquqbuzar haydovchi N.A.ga Ma’muriy javobgarlik to‘g‘risidagi kodeksning 195-moddasi (Ichki ishlar organlari xodimlarining o‘z xizmat burchlarini bajarishlariga qarshilik ko‘rsatish) va 194-moddasi 1-qismi (Ichki ishlar organlari xodimining qonuniy talablarini bajarmaslik) bilan 10 sutka ma’muriy qamoq jazosi tayinlangan.

Fuqaroning karantin qoidalariga rioya etmagani yuzasidan Samarqand shahar DSEOM tomonidan surishtiruv ishlari olib borilmoqda.