Фарғона вилояти юқумли касалликлар шифохонасида коронавирус инфекциясига чалинган 19 нафар бемор соғайди. Соғлиқни сақлаш вазирлигидан маълум қилишларича, соғайганларнинг 9 нафари Туркиядан, 1 нафари Саудия Арабистонидан келган ва карантинга олинган, қолган тўққиз киши коронавирусга чалинган беморлар билан мулоқотда касалликни юқтириб олган эди.
«Улардан 11 нафари Фарғонадан, 3 нафари Тошкент шаҳридан, 2 нафари Самарқанддан, Жиззах, Сирдарё ва Тошкент вилоятларидан 1 нафардан. Беморларнинг 10 нафари эркак, 9 нафари аёл бўлиб, улар орасида уч ойлик чақалоқ ҳам бор. Энг ёши каттаси 61 ёшда», — дейилади вазирлик ахборотида. Бунгача Фарғона вилояти бўйича 11 нафар бемор соғайган эди.
Шунингдек, Тошкентдаги Эпидемиология, микробиология ва юқумли касалликлар илмий-текшириш институти клиникасидан коронавирус инфекциясига чалинган навбатдаги 10 нафар бемор буткул соғайди. Улардан 9 нафари коронавирус инфекциясига чалинган беморлар билан мулоқот орқали касалликни юқтириб олган, 1 нафари эса Қозоғистондан келган ва карантин марказига жойлаштирилган эди.
«Уларнинг 7 нафари Тошкент шаҳридан, Жиззах, Фарғона ва Тошкент вилоятидан 1 нафардан. Инфекция аниқлангач, Эпидемиология, микробиология ва юқумли касалликлар илмий-текшириш институти клиникасига ётқизилган. Беморлардан 6 нафари эркак, 4 нафари аёллардир. Улар орасида энг ёши каттаси 55 ёшда бўлса, энг ёши кичиги 14 ёшда», — дейилади вазирлик хабарида. Бунгача ушбу клиникада 58 нафар бемор соғайган эди.
Шундай қилиб, Ўзбекистон бўйлаб коронавирус инфекциясидан буткул соғайганлар сони 24 апрель соат 13:00 ҳолатига кўра 592 нафарга етди. Эслатиб ўтамиз, 24 апрель соат 10:00 ҳолатига кўра Ўзбекистонда коронавирус инфекциясини юқтириб олиш билан боғлиқ 1778 та ҳолат аниқланган, беморларнинг етти нафари вафот этган.
Изоҳ (0)