Qozog‘istonning Qo‘stanoy shahrida yashovchi faol Toktar Maxmetov muammoga jamoatchilik e’tiborini qaratishga ijodiy yondashdi, deb xabar beradi “Nur.kz”.
U shaharning o‘nqir-cho‘nqir yo‘llariga yodgorlik o‘rnatdi, motamsaro tus berish uchun esa ularning yoniga gullar qo‘yib qo‘ydi.
Jamoatchilik faoli rasm va videolarni Instagram’dagi sahifasida e’lon qilgan. Ularda chuqurlari ko‘p yo‘llar aks etgan. “Qabrtoshi”da esa “Bu yerda qachonlardir asfalt bo‘lgan edi. Qo‘stanoy. 2020-yilning bahori”, deb yozilgan.
Postga izoh sifatida Toktar Maxmetov normal asfalt haqidagi xotiralar tezda unut bo‘layotganini yozadi.
https://www.instagram.com/p/B9zKvQwA0qN/
“Yodimizda, sevamiz va qayg‘udamiz. Biroq umid qilamiz va ishonamiz”, — deb yozadi u.
Ijtimoiy tarmoq foydalanuvchilari jamoatchilik faolining g‘oyasini qo‘llab-quvvatlagan.
“Siz asfaltni haligacha eslaysizmi?”, “Shahardagi yo‘llarni sozlang! Asfalt bahorda qor bilan birga erib ketmasin”, “Har yili shu ahvol!”, “Jonga tegdi”, “Ijodiy yondashuv uchun 5+” deya firklarini yozib qoldirgan shaharliklar.
Qo‘stanoy viloyati hokimligi matbuot xizmati jamoatchilik faolining ushbu tashabbusini ko‘rgani, imkon bo‘lishi bilan tegishli tashkilotlar yo‘llardagi sharoitni yaxshilash ishlariga kirishishini ma’lum qilgan.
Izoh (0)