Қозоғистоннинг Қўстаной шаҳрида асфальт «дафн қилинди»

Қозоғистоннинг Қўстаной шаҳрида яшовчи фаол Токтар Махметов муаммога жамоатчилик эътиборини қаратишга ижодий ёндашди, деб хабар беради «Nur.kz».

У шаҳарнинг ўнқир-чўнқир йўлларига ёдгорлик ўрнатди, мотамсаро тус бериш учун эса уларнинг ёнига гуллар қўйиб қўйди.

Жамоатчилик фаоли расм ва видеоларни Instagram’даги саҳифасида эълон қилган. Уларда чуқурлари кўп йўллар акс этган. «Қабртоши»да эса «Бу ерда қачонлардир асфальт бўлган эди. Қўстаной. 2020 йилнинг баҳори», деб ёзилган.

Постга изоҳ сифатида Токтар Махметов нормал асфальт ҳақидаги хотиралар тезда унут бўлаётганини ёзади.

https://www.instagram.com/p/B9zKvQwA0qN/

«Ёдимизда, севамиз ва қайғудамиз. Бироқ умид қиламиз ва ишонамиз», — деб ёзади у.

Ижтимоий тармоқ фойдаланувчилари жамоатчилик фаолининг ғоясини қўллаб-қувватлаган.

«Сиз асфальтни ҳалигача эслайсизми?», «Шаҳардаги йўлларни созланг! Асфальт баҳорда қор билан бирга эриб кетмасин», «Ҳар йили шу аҳвол!», «Жонга тегди», «Ижодий ёндашув учун 5+» дея фиркларини ёзиб қолдирган шаҳарликлар.

Қўстаной вилояти ҳокимлиги матбуот хизмати жамоатчилик фаолининг ушбу ташаббусини кўргани, имкон бўлиши билан тегишли ташкилотлар йўллардаги шароитни яхшилаш ишларига киришишини маълум қилган.