Qashqadaryo viloyatining Dehqonobod tumanida fuqaroning 5 million so‘mlik 2 bosh qo‘yi o‘g‘irlandi. Bu haqda “Daryo”ga viloyat IIB axborot xizmati rahbari Iroda Rasulova ma’lum qilmoqda.
Ma’lum bo‘lishicha, Dehqonobod tumanining “Oydin yo‘l” mahallasida yashovchi Sherali Ko‘chimov tuman IIB boshlig‘iga murojaat qilib, 2020-yil 25-fevraldan 26-fevralga o‘tar kechasi noma’lum shaxslar yashash uyidan jami narxi 5 million so‘mlik 2 bosh qo‘yini o‘g‘irlab ketganini aytgan.
Tuman IIB xodimlarining sa’y-harakati bilan mazkur jinoyat ishi ochilgan. Aniqlanishicha, ushbu jinoyatni 21 yoshli dehqonobodlik J.Q. va kosonlik X.O. sodir etgani oshkor bo‘lgan. Ulardan 1 million 150 ming so‘m pul dalil sifatida hujjatlashtirib olingan.
“Yoshlarning ushbu qilmishi jamoatchilik o‘rtasida muhokama qilinib, mahalla faollariga ularni to‘g‘ri yo‘lga boshlash mas’uliyati yuklatildi”, — deydi Iroda Rasulova.
Mazkur holat yuzasidan tuman IIB tomonidan Jinoyat kodeksining 169-moddasi (O‘g‘rilik) 2-qismi “v”, “g” bandlari bilan jinoyat ishi qo‘zg‘atilib, J.Q. va X.O. qo‘lga olingan.
Mavzuga doir:
- Chiroqchiliklar mol o‘g‘rilari IIB e’tiboridan chetda qolayotganidan shikoyat qilgandi. Tuman IIB vaziyatga izoh berdi
- Qashqadaryoda mol o‘g‘riligida gumon qilingan erkak IIB xodimlari tomonidan kaltaklanishi oqibatida vafot etgani aytilmoqda
- Chiroqchida bir necha IIB xodimi qamoqqa olindi. Ular odam o‘ldirishda gumon qilinmoqda
Izoh (0)