Farg‘ona universiteti prorektori soxta hujjatlar bilan 18 abituriyentni o‘qishga kiritib qo‘yganlikda ayblanmoqda

Farg‘ona shahar prokuraturasi tomonidan Farg‘ona davlat universitetida kirish imtihonlari natijalari soxtalashtirilgani holati yuzasidan Jinoyat kodeksining 228-moddasi 2-qismi “b” bandi (bir guruh shaxslar tomonidan oldindan til biriktirib hujjatlar, shtamplar, muhrlar, blankalar tayyorlash, ularni qalbakilashtirish, sotish yoki ulardan foydalanish) bilan jinoyat ishi qo‘zg‘atilib, tergov harakatlari olib borilmoqda, deya xabar bermoqda Bosh prokuratura matbuot xizmati.

Aniqlanishicha, Farg‘ona davlat universiteti prorektori A.A. 2019/2020-o‘quv yili uchun “Jismoniy madaniyat” imtihon komissiyasining mas’ul kotibi etib tayinlanib, 2019-yil iyul oyida o‘tkazilgan “Jismoniy madaniyat” fakultetiga kirish imtihonlari jarayonida komissiyaning boshqa a’zolari bilan jami 18 nafar abituriyentning imtihon natijalarini sun’iy ravishda oshirib ko‘rsatgan.

“Soxtalashtirish natijasida ushbu abituriyentlar oliy ta’lim muassasiga o‘qishga qabul qilingan”, — deyiladi Bosh prokuratura axborotida. Prorektorga nisbatan 4-mart, chorshanba kuni, Jinoyat kodeksining 205-moddasi 1-qismi (hokimiyat yoki mansab vakolatini suiiste’mol qilish) va 209-moddasi 2-qismi “a” (takroran yoki xavfli retsidivist tomonidan sodir etilgan mansab soxtakorligi) bandi bilan ayb e’lon qilingan.

“Tergov harakatlari olib borilmoqda”, — deya qo‘shimcha qilingan Bosh prokuratura axborotida.