Shavkat Mirziyoyev “Lukoyl” prezidenti Vagit Alekperovni qabul qildi

O‘zbekiston Prezidenti Shavkat Mirziyoyev 5-mart, juma kuni, Rossiyaning “Lukoyl” kompaniyasi prezidenti Vagit Alekperovni qabul qildi. Bu haqda Prezident matbuot xizmati xabar berdi.

Qayd etilishicha, davlat rahbari mehmonni qutlar ekan, jahonning yetakchi energetik korporatsiyalaridan biri va O‘zbekiston neft-gaz kompleksining muhim investori — “Lukoyl” bilan strategik sheriklikda sezilarli rivojlanishga erishilganini alohida ta’kidladi.

Bugungi kunda kompaniyaning qo‘shma loyihalarga kiritgan sarmoyalari hajmi 10 milliard dollar atrofida. Yiliga 8 milliard kub metrdan ziyod tabiiy gazni qayta ishlash quvvatiga ega Qandim gazni qayta ishlash majmuasi muvaffaqiyatli faoliyat yuritmoqda. Janubi-g‘arbiy Hisor va Ustyurtdagi konlarni o‘zlashtirish davom etyapti. Bundan tashqari, “Lukoyl” O‘zbekistondagi ijtimoiy dasturlarni faol qo‘llab-quvvatlamoqda.

Uchrashuvda o‘zaro manfaatli hamkorlikni yanada kengaytirish istiqbollari ko‘rib chiqildi.

Kompaniyaning korporativ boshqaruv va neft-gaz tarmog‘ida raqamli texnologiyalarga o‘tish borasidagi tajribasi va ilg‘or yechimlarini jalb etish masalasiga alohida e’tibor qaratildi.

O‘zbekiston hududida geologiya-qidiruv sohasida hamda uglevodorod konlarini, shu jumladan, qazib olinishi qiyin bo‘lganlarini o‘zlashtirish borasida kooperatsiyani mustahkamlash imkoniyatlari muhokama qilindi.

Ilmiy izlanishlar hamda energetika sektori uchun yuqori malakali kadrlarni tayyorlash sohasida hamkorlik qilish ustuvor yo‘nalish sifatida belgilab olindi.

Eslatib o‘tamiz, O‘zbekiston “Lukoyl” tomonidan qazib olingan gazning bir qismini ichki bozorga jalb qilgani sababli mazkur kompaniyadan 600 million dollar miqdorida qarzdor bo‘lgan.