O‘zbekiston Prezident Shavkat Mirziyoyev 5-mart, payshanba kuni, mamlakat xotin-qizlarining eng faol va tashabbuskor vakillaridan biri — Farg‘ona viloyati, Oltiariq tumanidagi “Nurli obod” fermer xo‘jaligining rahbari, O‘zbekiston Qahramoni, Oliy Majlis Senati a’zosi Lola Murotova bilan telefon orqali muloqotda bo‘lib, yaqinlashib kelayotgan qutlug‘ bayram bilan qizg‘in tabrikladi. Bu haqda Prezident matbuot xizmati xabar berdi.
Qayd etilishicha, davlat rahbari samimiy suhbat chog‘ida Lola Murotovaning mamlakat qishloq xo‘jaligi va fermerlik harakati rivojiga, joylardagi ijtimoiy muammolarni hal qilishga qo‘shayotgan beqiyos hissasini, ko‘p yillik zahmatli va halol mehnatlarini, Vatanning gullab-yashnashi yo‘lidagi munosib xizmatlarini alohida ta’kidlab o‘tdi.
Prezident Lola Murotova o‘zining qirq yildan ortiq davr mobaynida boy tajribasi, butun bilimi va kuch-g‘ayratini mamlakat obodligi hamda farovonligiga safarbar etgani, shuningdek, jonkuyar, kamtar va oqila o‘zbek ayoli sifatida yosh avlod va butun mamlakat xotin-qizlari uchun chinakam o‘rnak va namuna bo‘layotganini hurmat bilan qayd etdi.
Davlat rahbari hozirgi vaqtda davolanishda bo‘lgan mashhur fermerga mustahkam sihat-salomatlik va bardamlik, hamisha yaqinlari ardog‘ida bo‘lib yurishlikni tiladi.
Lola Murotova, o‘z navbatida, Prezidentga ish jadvali tig‘iz bo‘lishiga qaramay ko‘rsatgan cheksiz g‘amxo‘rlik va qo‘llab-quvvatlashlari uchun chin qalbdan tashakkur izhor etdi.
Bunday samimiy iltifot va rag‘batni mamlakatning barcha ayollariga doimiy ravishda ko‘rsatib kelinayotgan yuksak ehtiromning yorqin ifodasi sifatida mamnunlik bilan qabul qilishini aytib o‘tdi.
Davlat rahbarining topshirig‘iga binoan, shu kuni Oliy Majlis Senatining raisi Tanzila Norboyeva O‘zbekiston Qahramoni Lola Murotovani qutlug‘ ayyom munosabati bilan qutlash va holidan xabar olish uchun Farg‘ona viloyatiga shaxsan tashrif buyurdi hamda Prezidentning bayram sovg‘alarini topshirdi.
Eslatib o‘tamiz, Lola Murotova 2019-yilda “O‘zbekiston Qahramoni” unvoni bilan taqdirlangan edi. 2019-yilning sentabr oyida Lola Murotova Qo‘qonda bo‘lib o‘tgan Xalqaro hunarmandchilik festivalida O‘zbekiston birinchi xonimi Ziroatxon Mirziyoyeva bilan uchrashgan va muloqot qilgan. Senator etib saylangach, O‘zLiDeP Siyosiy kengashining 18-yanvar kuni bo‘lib o‘tgan yig‘ilishida so‘zga chiqqan Lola Murotova Prezident ayollarga hokimlik lavozimini ishonib topshirsa, ular bu vazifani do‘ndirib bajarishini aytgan.
Izoh (0)