O‘zbekiston Prezidenti Shavkat Mirziyoyev 5-mart, payshanba kuni, Yevropa tiklanish va taraqqiyot banki prezidenti Suma Chakrabarti boshchiligidagi ushbu moliyaviy institut delegatsiyasini qabul qildi. Bu haqda Prezident matbuot xizmati xabar berdi.
Ta’kidlanishiicha, O‘zbekiston va YeTTB 2017-yilda sheriklik qayta yo‘lga qo‘yilgani tufayli o‘tgan davrda bankning mamlakat strategiyasi va qo‘shma “yo‘l xaritasi” qabul qilindi va amalga oshirilmoqda.
Qayd etilishicha, yangi investitsiyalar hajmi 1,1 milliard dollarga yetib, energetika, issiqlik va suv ta’minoti, kommunikatsiyalar, yo‘l va uy-joy qurilishi kabi ustuvor tarmoqlarga yo‘naltirilgan. Ayni paytda YeTTB kiritgan sarmoyaning uchdan bir qismi xususiy sektor tashabbuslarini qo‘llab-quvvatlashga qaratilmoqda.
Toshkentdagi vakolatxonadan tashqari bank Andijonda o‘z ofisini ochdi, 2020-yilning oxirigacha Urganchda ham ochishni rejalashtirmoqda.
Davlat rahbari ikki tomonlama hamkorlikda bunday yuksak darajaga erishilganida Suma Chakrabartining shaxsiy hissasi va faol sa’y-harakatlarini alohida qayd etdi.
Uchrashuvda uzoq muddatli istiqbolga mo‘ljallangan amaliy hamkorlikning ustuvor yo‘nalishlari batafsil ko‘rib chiqildi.
YeTTB prezidenti ushbu yetakchi xalqaro moliyaviy tashkilot O‘zbekistonda amalga oshirilayotgan islohotlar dasturiga har tomonlama ko‘maklashishni davom ettirish hamda sheriklik ko‘lamini tubdan kengaytirishga tayyor ekanini bildirdi.
Infratuzilmani modernizatsiya qilish, bank sohasi, to‘qimachilik va sanoatning boshqa tarmoqlarini rivojlantirish, kichik biznes tashabbuslarini qo‘llab-quvvatlash bo‘yicha ustuvor loyihalarni ishlab chiqish va ilgari surishga alohida e’tibor qaratildi.
Shuningdek, mamlakat iqtisodiyotiga to‘g‘ridan to‘g‘ri investitsiyalar, ilg‘or tajriba, bilim va texnologiyalarni jalb qilishga qaratilgan qo‘shma tadbirlarning rejasi va kun tartibi yuzasidan fikr almashildi.
Izoh (0)