Asaka tumanlararo iqtisodiy sudi sudyasi S.Husanovning “Marhamattekstil” kompaniyasiga nisbatan da’vo qo‘zg‘agan bir guruh fermerlarning ishini sayyor sud majlisida ko‘rib chiqish jarayonidagi xatti-harakatlari haqida “Xabar.uz” nashrida “Sayyor sudda sudya va hokimlik vakili ‘kalla urishtirdi’!” sarlavhali maqola e’lon qilingan edi. Maqolaga O‘zbekiston Oliy sudi munosabat bildirdi.

Maqolada sudyaning hokimlik vakili bilan “kalla urishtirishi” haqida shunday deyilgan edi:

“... Oradan chamasi 10 daqiqalar vaqt o‘tgach, tag‘in eshik ochilib, endi ostonada Marhamat tumani hokimligining bo‘lim boshliqlaridan biri ko‘rindi. U ishtirokchilarga qarata ‘Hormanglar!’ dedi-da, to‘ppa-to‘g‘ri sudyaning qarshisiga keldi (xuddiki sud majlisiga emas, choyxonadagi oshxo‘rlikka kelgan odamdek!). Ikki qo‘llab ko‘rishdi. Xo‘shlashish jarayonida tomonlar yengilgina bosh urishtirib ham olishdi (ana manzara-yu mana manzara)!..”.

Oliy sud matbuot xizmati rahbari Aziz Obidovning ma’lum qilishicha, maqolada qalamga olingan holatlar tegishli tartibda o‘rganib chiqilgan. Natijada Oliy sud tomonidan Andijon viloyati Asaka tumanlararo iqtisodiy sudining raisi S.Husanovni intizomiy javobgarlikka tortish haqida to‘plangan hujjatlar tegishli qaror qabul qilish uchun Sudyalar oliy kengashiga yuborilgan.