Шавкат Мирзиёев Тошкент шаҳрида амалга ошириладиган қурилиш ва ижтимоий лойиҳалар билан танишди

21 февраль, жума куни, Шавкат Мирзиёев 2020 йил Тошкент шаҳрида амалга ошириладиган қурилиш ва ижтимоий лойиҳалар билан танишди. Бу ҳақда Президент матбуот хизмати хабар қилган.

Хабарга кўра, 2020 йилда Тошкентда кенг кўламли бунёдкорлик лойиҳалари амалга оширилиши режалаштирилган. Хусусан, Бектемир туманининг «Мажнунтол», «Бектемир», «Олтин топган», «Бинокор» маҳаллалари, Ҳусайн Бойқаро, Зироат кўчалари бўйлаб умумий узунлиги қарийб 18 минг погон метр янги ичимлик суви қувурлари ўрнатилиши мўлжалланган. Бунинг натижасида 6,8 мингдан ортиқ аҳоли марказлашган ичимлик суви билан таъминланади, пойтахт бўйлаб марказлашган ичимлик суви билан таъминланганлик даражаси 100 фоизга етказилади.

Тошкент шаҳридаги «Бўзсув» ва «Салар» сув тозалаш иншоотларининг қувватини суткасига 200 минг метр кубга ошириш режалаштирилган.

Президентнинг Учтепа туманига ташрифи давомида берган топшириғига мувофиқ, 697 та лифтни янгилаш кўзда тутилган. Йилига 700 тадан лифт янгиланса, яқин 5 йилда пойтахтдаги муддатини ўтаб бўлган лифтларнинг барчасини алмаштиришга эришилади.

2020 йилда Бектемир, Олмазор, Шайхонтоҳур, Яшнобод туманларида янги мактабгача таълим муассасалари қуриш кўзда тутилган. Шунингдек, Бектемир ва Яшнобод туманларида мактаб, Сергели туманида кўп тармоқли шифохона, Чилонзор ва Яшнобод туманларида оилавий поликлиника, Сергели ва Олмазор туманларида янги маданият марказлари қурилиши белгиланган. Умумий ҳисобда 1,047 минг квадрат метр йўл таъмирланади.

Шавкат Мирзиёевга ана шу лойиҳалар ҳақида батафсил маълумот берилди. Президент лойиҳаларнинг самарадорлиги ва ижтимоий аҳамиятига алоҳида эътибор қаратиб, уларнинг белгиланган муддатларда амалга оширилишини таъминлаш бўйича кўрсатмалар берди, дейилган хабарда.

19—20 февраль кунлари Шавкат Мирзиёев Туркия Республикаси раҳбари Ражаб Тоййиб Эрдўғоннинг таклифига биноан ушбу мамлакатга ташриф буюрган. Давлат раҳбарлари дастлаб тор доирада музокара ўтказган. Президентлар раислигида Олий даражадаги стратегик ҳамкорлик кенгашининг биринчи йиғилиши бўлиб ўтганди. Стратегик ҳамкорлик кенгашининг биринчи йиғилиши натижалари тўғрисида қўшма баёнот, шунингдек, иқтисодиёт, савдо, технологиялар соҳасига оид ҳужжатлар имзоланган. Ташрифнинг иккинчи кунида давлат раҳбари Туркиянинг етакчи компания ва банклари раҳбарлари билан учрашув ўтказган. Туркия президенти ҳузуридаги Халқ кутубхонасининг очилиш маросимида иштирок этиб ушбу маскан билан яқиндан танишганди.