O‘zbekiston Savdo-sanoat palatasi va Turkiya Iqtisodiyot va texnologiyalar universiteti o‘rtasida mazkur oliy o‘quv yurtining Toshkentdagi filialini ochish bo‘yicha memorandum imzolandi. Bu haqda palata matbuot xizmati xabar berdi.
Qayd etilishicha, O‘zbekiston Prezidenti Shavkat Mirziyoyevning Turkiyaga rasmiy tashrifi doirasida Anqara shahrida o‘tkazilgan oliy darajadagi O‘zbekiston—Turkiya birinchi strategik hamkorlik yig‘ilishi natijalari bo‘yicha qo‘shma bayonot imzolandi.
Mavziga doir: Anqarada oliy darajadagi O‘zbekiston—Turkiya strategik hamkorlik kengashining birinchi yig‘ilishi bo‘lib o‘tdi
Tadbir doirasida ikki davlat o‘rtasidagi savdo-iqtisodiy aloqalar bo‘yicha ham qator kelishuvlarga erishildi. Xususan, O‘zbekiston Savdo-sanoat palatasi va Turkiya savdo palatalari va birjalari ittifoqi huzuridagi Turkiya Iqtisodiyot va texnologiyalar universitetining Toshkentdagi filialini ochish to‘g‘risidagi memorandum imzolandi.
Ma’lum qilinishicha, O‘zbekistonda mazkur oliy o‘quv yurti filialini ochish tashabbusi 2019-yil oktabr oyida Toshkentda bo‘lib o‘tgan Turkiy tilli davlatlar ishbilarmonlar kengashi doirasida o‘tkazilgan muzokaralarda ilgari surilgan va kelishilgan.
Toshkentda faoliyat boshlashi ko‘zda tutilgan universitet filiali dual ta’lim tizimi asosida biznes va tadbirkorlik yo‘nalishlarida mutaxassislar tayyorlashi kutilmoqda.
Avvalroq Toshkentda Rossiyaning A.I.Gersen nomidagi Rossiya davlat pedagogika universiteti filiali hamda Yaponiya raqamli universiteti ochilishi haqida xabar berilgan edi.
Izoh (0)