Toshkent shahar hokimi Jahongir Ortiqxo‘jayev Misrning Elsewedy Electric kompaniyasi direktorlar kengashi raisi Ahmad al-Suveydiy boshchiligidagi delegatsiya bilan uchrashdi. Bu haqda 21-fevral, juma kuni, Toshkent shahar hokimligi matbuot xizmati xabar berdi.
Ahmad al-Suveydiy o‘z kompaniyasi haqida ma’lumot berar ekan, Elsewedy Electric qayta tiklanadigan energiya ishlab chiqarish uchun kabellar, transformatorlar, elektrotexnika buyumlari, elektr uzatish tarmoqlarini qurish va jihozlash, tarqatish tizimlari, gaz hisoblagichlarini ishlab chiqarish bo‘yicha yetakchilardan biri ekanligini aytib o‘tgan.
Ta’kidlanishicha, hozirda kompaniyaning Ruminiya, Gretsiya, Sloveniya, Chexiya, Qatar, Jazoir, Suriya, Bangladesh, Tanzaniya, Gana kabi mamlakatlarda filiallari bor. “U Toshkentda drayport (quruqlikdagi logistika markazi) qurish, smart hisoblagichlar ishlab chiqarish va elektr energiyasi ta’minoti sohasida birgalikda ishlash niyati borligini aytib o‘tdi”, — deyiladi hokimlik axborotida.
Uchrashuvda hokim Jahongir Ortiqxo‘jayev xorijiy mehmonga Toshkentda amalga oshirilishi rejalashtirilgan qator loyihalarni taklif qilgan. “Mazkur taklifga asosan, kompaniya mutaxassislari tegishli tizimlarni o‘rganishadi va ularning xulosalariga ko‘ra, hamkorlik istiqbollari belgilanadi”, — deya qo‘shimcha qilingan shahar hokimligi axborotida.
Izoh (0)