Adliya vazirligi tomonidan 2013—2017-yillarda 500 ta qonunchilik hujjati loyihasi ishlab chiqilgan bo‘lsa, oxirgi ikki yilda ham 500 ta qonunchilik hujjati loyihasi ishlab chiqilgan. Shu davrda besh mingdan ortiq hujjat huquqiy ekspertiza uchun kelib tushgan. Bu haqda, 3-fevral kuni vazirlik binosida jurnalist va blogerlar uchun o‘tkazilgan media tadbirda ma’lum qilindi, deya xabar bermoqda “Daryo” muxbiri Mirolim Isajonov.
Ochiq muloqotda qatnashgan adliya vaziri Ruslanbek Davletov 2019-yilda amalga oshirilgan ishlar va joriy yilgi rejalar haqida so‘zlar ekan, davlat xizmatlari markazlari faoliyatiga ham alohida to‘xtalib o‘tdi.
“Davlat xizmatlari to‘g‘risida ham fikrlarimni aytib o‘tsam. Oxirgi ikki yarim-uch yil ichida propiska bilan bog‘liq salbiy oqibatlarni yengillashtirishga qaratilgan qator ishlar amalga oshirildi. Buni tan olish kerak. Masalan, oldin vaqtincha yoki doimiy propiska bo‘lmasa, Toshkent shahrida ishlash mumkin emasdi. Bu bekor bo‘ldi. Propiskasi yo‘q xodimni ishga olganda, javobgarlik masalasi bor edi. Mazkur tartib ham o‘tgan yili qabul qilingan qonun bilan bekor qilindi. Qisqasi, biz doim mavjud jarayonlar bo‘yicha o‘zimizning tegishli takliflarimizni berib kelganmiz. Yaqindagi Murojaatnomadan keyin Prezidentimiz xalqaro tajribadan kelib chiqib, propiskani to‘liq o‘rganish masalasi bo‘yicha topshiriq berdi. Bu boradagi ishlar olib borilyapti.
Xizmat ko‘rsatish nuqtayi nazaridan shuni aytishimiz kerakki, bizning hamma markazlarimiz eksterritorial tamoyil asosida yo‘lga qo‘yilgan. Yurtimizning qayeridan bo‘lishingizdan qat’iy nazar, har qanday tuman yoki shaharga borib, davlat xizmatlarini olishingiz mumkin.
Shuningdek, bugungi kunda davlat xizmatlari markazida to‘g‘ridan-to‘g‘ri hisob raqamni ham ochish imkoniyati paydo bo‘ldi. Bankka ham borish shart emas. Muhr va shtamp degan narsalar bekor bo‘ldi, umuman kerakmas. Investitsiya ishtirokidagi korxona talablari kamaytirildi. Ustav kapitaliga bo‘lgan talablar minimallashtirildi. Har bitta markazda elektron tizim yo‘lga qo‘yildi. Ishimizga har bir mijozning o‘zi baho berib ketyapti. Operator xodimlarning kunlik qilgan ishi bo‘yicha tahlillarni ko‘rsatib bermoqda. Shunga qarab, biz baho qo‘yayapmiz, tizimga yangilik kirityapmiz. Yaqinda attestatsiya orqali birdaniga 40 foiz xodimni ishdan bo‘shatdik. Bu biz uchun juda katta yo‘qotish, lekin majburmiz shu ishni qilishga. Negaki, hozirgi talab boshqa, xalqqa nisbatan muomala boshqacha bo‘lishi kerak.
Shu o‘rinda ta’kidlash joiz, davlat ro‘yxatidan o‘tkazish bo‘yicha dunyo miqyosida 190 ta mamlakat ichida 8-o‘rinni egalladik. Buyuk Britaniya, AQSh kabi davlatlar orasida ham biz juda oldinga ketganimizni butun dunyo tan oldi. Chunki buni o‘zlaringiz ham ko‘ryapsizlar. Xohlagan odam internet orqali “Lyubaya biznes xorosha” va boshqa nomdagi MChJlarni ro‘yxatdan o‘tkazdi. Bu ozodlik, yengillik degani. Chunki siz xohlagancha firmangizni internet orqali ro‘yxatdan o‘tkazyapsiz. Shuni orqasidan bo‘lyapti bizning bu kabi reytinglarimiz”, — dedi adliya vaziri.
Izoh (0)