Majburiy ijro byurosi Andijon viloyati Baliqchi tumanida 6 milliard so‘mlik tabiiy gaz talon-toroj qilinganini aniqladi. Bu haqda “Daryo”ga Majbuiy ijro byurosi ma’lum qildi.
Xabar berilishicha, Majburiy ijro byurosi Andijon viloyati boshqarmasi tomonidan fuqarolar M.J. va S.X.ni Jinoyat kodeksining 185-2-moddasi 4-qismi bilan ayblash haqidagi jinoyat ishi bo‘yicha surishtiruvda “O‘ztransgaz” Andijon hududiy gaz ta’minoti filiali 6-son Shahrixon tumanlararo uchastkasi Baliqchi tuman bo‘limi faoliyatini taftish qilish tayinlangan.
Taftishda mazkur bo‘lim boshliqlari D.X. va O.A. 2018—2019-yillarda o‘z xizmat vazifalari yuzasidan bajarishi lozim yoki mumkin bo‘lgan harakatlarni qasddan bajarmasdan kelganligi aniqlangan.
Jumladan, tumanda o‘rnatilgan yuqori va o‘rta bosimli 294 ta gaz taqsimlash qurilmalaridan 80 tasi 2018—2019-yillarda taftishdan o‘tkazilmagan, tabiiy gaz hisoblagichlarining ko‘rsatkichlari har oyda hisobotlarga kiritib borilmagan, gaz taqsimlash qurilmalarida yo‘qotilgan tabiiy gazning yo‘qotish hajmlarini aniqlash choralari ko‘rilmagan.
M.J. va boshqalar tomonidan talon-toroj qilingan 3,6 million metr kub tabiiy gaz bo‘yicha sud hukmi chiqarilgan bo‘lsa-da, talon-toroj qilingan ushbu tabiiy gaz hajmlari hisobotdan chiqarib tashlanmagan.
Natijada tumanga 2018-yil va 2019-yilning 9 oyida aholi va boshqa iste’molchilar uchun olingan jami 63,6 million metr kub tabiiy gaz bilan hisobotda qayd etilgan tabiiy gaz o‘rtasida 6,9 milliard so‘mlik tabiiy gaz tafovuti kelib chiqqan.
Fuqaro D.X.ga zararning 2,7 milliard so‘mlik, O.A.ga 4,2 milliard so‘mlik qismi to‘g‘ri kelgan.
Mazkur holatlar yuzasidan Majburiy ijro byurosi Andijon viloyat boshqarmasi tomonidan 2020-yil 28-yanvarda D.X. va O.A.ga nisbatan Jinoyat kodeksining 208-moddasi bilan jinoyat ishi qo‘zg‘atilib, tergovga tegishlilik masalasini hal etish uchun viloyat prokuraturasiga yuborilgan.
Izoh (0)