Qarshida ikki Damas to‘qnashishi oqibatida yonib ketgandi. O‘sha yo‘nalishda avtobuslar faoliyati yo‘lga qo‘yildi. Bu haqda “Daryo”ga Qashqadaryo transport boshqarmasi boshlig‘i Ulug‘bek Ernazarov ma’lum qildi.
2019-yil sentabr oyidagi mudhish voqea hamda ko‘p sonli fuqarolar murojaatiga asosan 210-yo‘nalishdagi Xonobod—Qarshi—Agora bozori yo‘nalishiga 210-raqamda harakatlanuvchi 18 ta avtobus qo‘ydik, — deydi Ulug‘bek Ernazarov.
Ma’lum bo‘lishicha, joriy yilning 31-yanvar kuni viloyat Transport boshqarmasi mas’ullari hamda 210-yo‘nalishda Damas haydagan 40 nafar haydovchi ishtirokida muloqot tashkil etilgan. Yangilik haqida tushuntirish berilgan. Avtobuslar Damas’larga qo‘shimcha tarzda faoliyat yuritishi aytilib, ularning qatnoviga hozircha hech qanday to‘siq yo‘qligi tushuntirilgan.
Ulug‘bek Ernazarovga ko‘ra, Qarshi shahrida faoliyat yuritayotgan Damas’lar o‘rniga bosqichma-bosqich avtobuslar qo‘yib boriladi.
Hozirda boshqarmamiz balansida 80 ta avtobus bor. Tadbirkorlar bilan kelishib, shaharga zamonaviy avtobuslar keltirishni boshladik. Tez orada shahar ichkarisida aholiga avtobuslar xizmat ko‘rsatishni boshlaydi, — deydi Ulug‘bek Ernazarov.
Aniqlanishicha, 210-yo‘nalish “Shahzod avtotrans” MChJ muassisligidagi uyushmaga biriktirilgan bo‘lib, uyushma tender bitimida 30 ta Damas faoliyat yuritayotganini bildirgan. Holat litsenziyalash bazasida o‘rganib chiqilganda esa 11 ta Damas litsenziya muddati tugagan bo‘lsa-da, noqonuniy faoliyat yuritib kelgani aniqlangan.
Eslatib o‘tamiz, 2019-yil 25-sentabr kuni Qarshi—Shahrisabz yo‘lining Xonobod qishlog‘i bilan tutashgan qismida ikki Damas ishtirokida yirik yo‘l-transport hodisasi sodir bo‘lib, yonib ketgandi. Yongan ikki Damas avtomobillarida jami 10 nafar kishi bo‘lib, besh nafari voqea joyida halok bo‘lgandi.
Izoh (0)