Ijtimoiy tarmoqlarda “Bizda ilmlining qadri bormi? Yoki matematikadan xalqaro olimpiada g‘olibiga zambarakning o‘qimi?!” sarlavhali xabar tarqaldi. Buxoro viloyati xalq ta’limi boshqarmasi axborot xizmati mazkur murojaatga munosabat bildirgan.
Munosabatda keltirilishicha, Prezidentning 2019-yil 3-maydagi “Iqtidorli yoshlarni aniqlash va yuqori malakali kadrlar tayyorlashning uzluksiz tizimini tashkil etish chora-tadbirlari to‘g‘risida”gi qarori bilan asosiy xalqaro olimpiadalar ro‘yxati tasdiqlangan. Ularning g‘oliblari va o‘qituvchilari pul bilan mukofotlanadi.
Jumladan, Buxoro viloyatida o‘tkazilgan Mirzo Ulug‘bek nomidagi matematika fan olimpiadasi g‘olib o‘quvchilari va ularning o‘qituvchilari viloyat hokimligi tomonidan 104 000 000 so‘m pul va qimmatbaho sovg‘alar bilan taqdirlangan.
Dunyoda tijorat olimpiadalari ham mavjud. Ularda o‘quvchilar to‘lov mablag‘lari evaziga ishtirok etadi. SEAMO xalqaro olimpiadasi shulardan biri.
Avstraliyada o‘tkazilgan SEAMO xalqaro olimpiadasida matematikadan oltin medalni qo‘lga kiritgan Qorako‘l tumanidagi matematika maktabi o‘quvchisi Bekzod Nuriddinov Toshkent xalqaro aeroportida oila a’zolaridan tashqari, matematika maktabi direktori Temur Ro‘ziyev boshchiligida viloyat delegatsiyasi, matematika maktabining sobiq bitiruvchilari ishtirokida kutib olingan.
Ushbu jarayon ijtimoiy tarmoqlar, Xalq ta’limi vazirligi rasmiy kanallari hamda OAV orqali keng yoritilgan.
“Ayni paytda buxorolik g‘olib o‘quvchi Bekzod Nuriddinov Toshkent shahrida. Joriy yilning 4-fevral kuni Buxoro viloyatiga yetib kelishini munosib kutib olish rejalashtirilgan”, — deyiladi xabarda.
Izoh (0)