Адлия вазирлиги томонидан 2013—2017 йилларда 500 та қонунчилик ҳужжати лойиҳаси ишлаб чиқилган бўлса, охирги икки йилда ҳам 500 та қонунчилик ҳужжати лойиҳаси ишлаб чиқилган. Шу даврда беш мингдан ортиқ ҳужжат ҳуқуқий экспертиза учун келиб тушган. Бу ҳақда, 3 февраль куни вазирлик биносида журналист ва блогерлар учун ўтказилган медиа тадбирда маълум қилинди, дея хабар бермоқда «Дарё» мухбири Миролим Исажонов.
Очиқ мулоқотда қатнашган адлия вазири Русланбек Давлетов 2019 йилда амалга оширилган ишлар ва жорий йилги режалар ҳақида сўзлар экан, давлат хизматлари марказлари фаолиятига ҳам алоҳида тўхталиб ўтди.
«Давлат хизматлари тўғрисида ҳам фикрларимни айтиб ўтсам. Охирги икки ярим-уч йил ичида прописка билан боғлиқ салбий оқибатларни енгиллаштиришга қаратилган қатор ишлар амалга оширилди. Буни тан олиш керак. Масалан, олдин вақтинча ёки доимий прописка бўлмаса, Тошкент шаҳрида ишлаш мумкин эмасди. Бу бекор бўлди. Пропискаси йўқ ходимни ишга олганда, жавобгарлик масаласи бор эди. Мазкур тартиб ҳам ўтган йили қабул қилинган қонун билан бекор қилинди. Қисқаси, биз доим мавжуд жараёнлар бўйича ўзимизнинг тегишли таклифларимизни бериб келганмиз. Яқиндаги Мурожаатномадан кейин Президентимиз халқаро тажрибадан келиб чиқиб, пропискани тўлиқ ўрганиш масаласи бўйича топшириқ берди. Бу борадаги ишлар олиб бориляпти.
Хизмат кўрсатиш нуқтаи назаридан шуни айтишимиз керакки, бизнинг ҳамма марказларимиз экстерриториал тамойил асосида йўлга қўйилган. Юртимизнинг қаеридан бўлишингиздан қатъий назар, ҳар қандай туман ёки шаҳарга бориб, давлат хизматларини олишингиз мумкин.
Шунингдек, бугунги кунда давлат хизматлари марказида тўғридан-тўғри ҳисоб рақамни ҳам очиш имконияти пайдо бўлди. Банкка ҳам бориш шарт эмас. Муҳр ва штамп деган нарсалар бекор бўлди, умуман керакмас. Инвестиция иштирокидаги корхона талаблари камайтирилди. Устав капиталига бўлган талаблар минималлаштирилди. Ҳар битта марказда электрон тизим йўлга қўйилди. Ишимизга ҳар бир мижознинг ўзи баҳо бериб кетяпти. Оператор ходимларнинг кунлик қилган иши бўйича таҳлилларни кўрсатиб бермоқда. Шунга қараб, биз баҳо қўяяпмиз, тизимга янгилик киритяпмиз. Яқинда аттестация орқали бирданига 40 фоиз ходимни ишдан бўшатдик. Бу биз учун жуда катта йўқотиш, лекин мажбурмиз шу ишни қилишга. Негаки, ҳозирги талаб бошқа, халққа нисбатан муомала бошқача бўлиши керак.
Шу ўринда таъкидлаш жоиз, давлат рўйхатидан ўтказиш бўйича дунё миқёсида 190 та мамлакат ичида 8-ўринни эгалладик. Буюк Британия, АҚШ каби давлатлар орасида ҳам биз жуда олдинга кетганимизни бутун дунё тан олди. Чунки буни ўзларингиз ҳам кўряпсизлар. Хоҳлаган одам интернет орқали «Любая бизнес хороша» ва бошқа номдаги МЧЖларни рўйхатдан ўтказди. Бу озодлик, енгиллик дегани. Чунки сиз хоҳлаганча фирмангизни интернет орқали рўйхатдан ўтказяпсиз. Шуни орқасидан бўляпти бизнинг бу каби рейтингларимиз», — деди адлия вазири.
Изоҳ (0)