Toshkentda 18-yanvar kuni Tadbirkorlar va ishbilarmonlar harakati — O‘zbekiston Liberal-demokratik partiyasi siyosiy kengashining majlisi o‘tkazilgani haqida xabar berilgan edi. Unda bosh vazir lavozimiga nomzod bosh vazir Abdulla Aripov hukumatning Harakatlar dasturini taqdim etdi.
Aripovning so‘zlariga ko‘ra, 2020-yilda ham makroiqtisodiy barqarorlikni ta’minlash, iqtisodiyotni, eng avvalo, uning bazaviy tarmoqlarini jadal rivojlantirish, faol investitsiya va tashqi iqtisodiy siyosatni amalga oshirish hukumat oldida turgan eng muhim vazifalardan biri hisoblanadi.
“2020-yilda iqtisodiyotda sanoat mahsulotlari ishlab chiqarish hajmi 6,5 foizga, qurilish ishlari 9,3 foiz, qishloq xo‘jaligi mahsulotlari 4 va xizmatlar ko‘rsatishni 5,7 foizga oshirish hisobiga yalpi ichki mahsulot 5,5 foizga o‘sishini ta’minlash choralari ko‘riladi. Shuningdek, 2020-yilda yalpi ichki mahsulot tarkibida sanoatning ulushi 30,3 foiz, investitsiyalarning ulushi esa 34,4 foizga yetkaziladi. Makroiqtisodiy o‘sish ko‘rsatikichlari 2019-yilga nisbatan past bo‘lmasligi to‘liq ta’minlanadi”, — dedi u.
Harakatlar dasturidan bank-moliya tizimini isloh qilish reajalari ham o‘rin olgan. Unga ko‘ra, Jahon banki ekspertlari bilan birgalikda bank sohasini rivojlantirishning uzoq muddatli strategiyasi hamda pul-kredit siyosatini rivojlantirish, valyutani tartibga solishning barqapor mexanizmlarini joriy qilish, milliy valyuta barqarorligini ta’minlash maqsadida respublikada valyuta bozorini yanada rivojlantirish strategiyasi ishlab chiqiladi.
Abdulla Aripov yig‘ilish davomida ichki bozorni mahalliy iste’mol tovarlari bilan to‘ldirish hamda inflyatsiya darajasini yuqori bo‘lmagan sur’atda ushlab qolishga e’tibor qaratilishi haqida ham gapirdi. Unga ko‘ra, “2021-yilda inflyatsiya darajasini 11 foiz, 2022-yilda esa 10 foizdan past bo‘lgan darajada saqlab turish choralari ko‘riladi”.
Izoh (0)