Тошкентда 18 январь куни Тадбиркорлар ва ишбилармонлар ҳаракати — Ўзбекистон Либерал-демократик партияси сиёсий кенгашининг мажлиси ўтказилгани ҳақида хабар берилган эди. Унда бош вазир лавозимига номзод бош вазир Абдулла Арипов ҳукуматнинг Ҳаракатлар дастурини тақдим этди.
Ариповнинг сўзларига кўра, 2020 йилда ҳам макроиқтисодий барқарорликни таъминлаш, иқтисодиётни, энг аввало, унинг базавий тармоқларини жадал ривожлантириш, фаол инвестиция ва ташқи иқтисодий сиёсатни амалга ошириш ҳукумат олдида турган энг муҳим вазифалардан бири ҳисобланади.
«2020 йилда иқтисодиётда саноат маҳсулотлари ишлаб чиқариш ҳажми 6,5 фоизга, қурилиш ишлари 9,3 фоиз, қишлоқ хўжалиги маҳсулотлари 4 ва хизматлар кўрсатишни 5,7 фоизга ошириш ҳисобига ялпи ички маҳсулот 5,5 фоизга ўсишини таъминлаш чоралари кўрилади. Шунингдек, 2020 йилда ялпи ички маҳсулот таркибида саноатнинг улуши 30,3 фоиз, инвестицияларнинг улуши эса 34,4 фоизга етказилади. Макроиқтисодий ўсиш кўрсатикичлари 2019 йилга нисбатан паст бўлмаслиги тўлиқ таъминланади», — деди у.
Ҳаракатлар дастуридан банк-молия тизимини ислоҳ қилиш реажалари ҳам ўрин олган. Унга кўра, Жаҳон банки экспертлари билан биргаликда банк соҳасини ривожлантиришнинг узоқ муддатли стратегияси ҳамда пул-кредит сиёсатини ривожлантириш, валютани тартибга солишнинг барқапор механизмларини жорий қилиш, миллий валюта барқарорлигини таъминлаш мақсадида республикада валюта бозорини янада ривожлантириш стратегияси ишлаб чиқилади.
Абдулла Арипов йиғилиш давомида ички бозорни маҳаллий истеъмол товарлари билан тўлдириш ҳамда инфляция даражасини юқори бўлмаган суръатда ушлаб қолишга эътибор қаратилиши ҳақида ҳам гапирди. Унга кўра, «2021 йилда инфляция даражасини 11 фоиз, 2022 йилда эса 10 фоиздан паст бўлган даражада сақлаб туриш чоралари кўрилади».
Изоҳ (0)