“Gruziya ham o‘ziga xos model tanlamagan” — vazir o‘rinbosari “Davletovuz” kanali taklifiga munosabat bildirdi

Kuni kecha Telegram’dagi “Davletovuz” kanali O‘zbekistonda “Elektr energiyasi taqchilligi muammosini hal qilsa bo‘ladimi?” nomli maqolasi orqali elektr energiyasi ta’minotida tez-tez kuzatilayotgan uzilishlarga barham berishda Gruziya tajribasidan foydalanishni taklif etgan edi.

Bugun, 18-yanvar kuni Toshkent xalqaro Vestminster universitetida “O‘zbekistonda energetika sohasini rivojlantirish istiqbollari” mavzusida o‘tkazilgan ochiq muloqotdan keyin Energetika vaziri o‘rinbosari Sherzod Xo‘jayev mazkur taklif borasida o‘z munosabatini bildirdi, deya xabar bermoqda “Daryo” muxbiri Mirolim Isajonov.

Taklifga munosabatim ijobiy. Lekin biz faqat Gruziya tajribaga tayanishimiz noto‘g‘ri bo‘ladi. Gruziya tajribasini bizning mamlakatimizga nisbatan qo‘llanilishini to‘g‘ri yoki noto‘g‘riligini aytishimiz uchun avval biz boradigan yo‘nalishimizni belgilab olishimiz kerak. Ya’ni qaysi bozor modeliga o‘tamiz. Shunga qaramasdan Gruziyada eng katta islohotlarni o‘tkazish davrida energetika vazirining o‘rinbosari bo‘lgan xodim hozirgi kunda mening jamoamda ishlayapti. Osiyo taraqqiyot banki tomonidan yollangan ekspert sifatida ular ayni mana shu kecha-kunduzda Toshkentda. Birgalikda bozor modelini ishlab chiqish borasida ishlayapmiz.

Agar biz Gruziya tajribasiga tayangan holda ishlab chiqqan bozor modelimiz hukumat tomonidan ma’qullansa, biz shu yo‘nalish bo‘yicha ketamiz. Bundan tashqari, Amerika, Buyuk Britaniya, Turkiya va boshqa mamlakatlardan ham ekspertlarni Jahon banki, OTB va Yevropa tiklanish va taraqqiyot banki bizga yollab bergan. Ular bilan ham ishlayapmiz. Qaysi modelni tanlaymiz, buni vaqt ko‘rsatadi.

Unutmasligimiz kerak, Gruziyada aholi soni bizdan deyarli 10 barobar kam. Ishlab chiqarish bo‘yicha salohiyati ham deyarli 10 barobar kam. Energetika strukturasi ham umuman boshqacha. Gruziya ham qandaydir o‘ziga xos orginal bir model tanlamagan. Ular ham boshqa mamlakatlar tajribasidan kelib chiqqan. Butun dunyoda 3-4 ta model ishlaydi, boshqa model yo‘q.

Sherzod Xo‘jayev, Energetika vaziri o‘rinbosari

Eslatib o‘tamiz, O‘zbekiston Prezidentining 2019-yil 1-fevraldagi qaroriga muvofiq O‘zbekiston Respublikasi Energetika vazirligi tashkil etilgan edi. O‘sha yilning 27-martidagi Prezident qaroriga asosan “O‘zbekenergo” aksiyadorlik jamiyati isloh qilinib, uning negizida “Issiqlik elektr stansiyalari”, “O‘zbekiston milliy elektr tarmoqlari” va “Hududiy elektr tarmoqlari” aksiyadorlik jamiyatlari tashkil topdi.