Samarqandda yaxmalak yo‘lda o‘nlab avtomobillar bir-biriga urilganligi to‘g‘risida xabar berilgan edi. IIV YHXBBning yozishicha, Samarqand viloyat Nurobod tumanida sodir bo‘lgan YTHda o‘ndan ortiq avtomobillar ishtirok etgan.
Samarqand viloyati Nurobod tumani hududidan o‘tuvchi yo‘lda haydovchi T.U. “Kamaz” rusumli avtomobilni “Qarshi—Samarqand” yo‘nalishida boshqarib borayotib, qalin tuman tushganligi, qor yog‘ayotganligi va ko‘rinish cheklanganligi sababli yo‘lning o‘ng chetiga to‘xtamoqchi bo‘lgan. Shu yo‘nalishda orqada harakatlanib kelayotgan Ford rusumli avtomobil haydovchisi E.T. yo‘lning qatnov qismi muzlaganligini inobatga olmaganligi oqibatida “KamAZ” rusumli avtomobilning orqa qismiga urilgan.
Shuningdek, ushbu avtomobil orqasidan bir yo‘nalishda harakatlanib kelayotgan haydovchi S.O. boshqaruvidagi Nexia rusumli va yana 10 ta turli rusumdagi yengil avtomobillar yo‘lning sirpanchiqligi tufayli ketma-ketlikda to‘qnashib, yo‘l-transport hodisasi sodir etgan.
Natijada, Ford rusumli avtomobil haydovchisi T.E, yo‘lovchisi Sh.Q. Nexia rusumli avtomobil yo‘lovchilari Z.X. va R.J. yengil darajadagi tan jarohatlari bilan kasalxonaga murojaat qilib, uylariga javob berilgan.
Bundan tashqari, oradan taxminan 5 daqiqa vaqt o‘tib, hodisa sodir bo‘lgan joydan 300 metr orqada Qashqadaryo viloyati Qamashi tumanida yashovchi, 1990-yilda tug‘ilgan haydovchi E.B. Nexia-2 rusumli avtomobilni “Qarshi—Samarqand” yo‘nalishida boshqarib borayotib Mercedes-Benz rusumli yuk avtomobili yarim tirkamasining orqa qismiga urilib, yo‘l-transport hodisasi sodir etgan.
Nexia-2 haydovchi B.E. “o‘ng bilak sohasini sinishi”, yo‘lovchisi N.X. “ko‘krak qafasi yopiq shikastlanishi, qovurg‘a suyaklarining sinishi” tashxisi bilan shifoxonaga yotqizilgan.
Shunindek, yo‘lovchilari Q.B. va R.Ch.larning yengil darajadagi tan jarohatlari bilan kasalxonaga murojaat qilgan va uylariga javob berilgan.
Ushbu yo‘l-transport hodisalari oqibatida hech kim vafot etmagan.
Hozirda mazkur yo‘l-transport hodisasi yuzasidan Samarqand viloyati IIB tomonidan tergovga qadar tekshiruv harakatlari olib borilmoqda.
Izoh (0)