Самарқандда яхмалак йўлда ўнлаб автомобиллар бир-бирига урилганлиги тўғрисида хабар берилган эди. ИИВ ЙҲХББнинг ёзишича, Самарқанд вилоят Нуробод туманида содир бўлган ЙТҲда ўндан ортиқ автомобиллар иштирок этган.
Самарқанд вилояти Нуробод тумани ҳудудидан ўтувчи йўлда ҳайдовчи Т.У. «Камаз» русумли автомобилни «Қарши—Самарқанд» йўналишида бошқариб бораётиб, қалин туман тушганлиги, қор ёғаётганлиги ва кўриниш чекланганлиги сабабли йўлнинг ўнг четига тўхтамоқчи бўлган. Шу йўналишда орқада ҳаракатланиб келаётган Ford русумли автомобиль ҳайдовчиси Э.Т. йўлнинг қатнов қисми музлаганлигини инобатга олмаганлиги оқибатида «КамАЗ» русумли автомобилнинг орқа қисмига урилган.
Шунингдек, ушбу автомобиль орқасидан бир йўналишда ҳаракатланиб келаётган ҳайдовчи С.О. бошқарувидаги Nexia русумли ва яна 10 та турли русумдаги енгил автомобиллар йўлнинг сирпанчиқлиги туфайли кетма-кетликда тўқнашиб, йўл-транспорт ҳодисаси содир этган.
Натижада, Ford русумли автомобиль ҳайдовчиси Т.Э, йўловчиси Ш.Қ. Nexia русумли автомобиль йўловчилари З.Х. ва Р.Ж. енгил даражадаги тан жароҳатлари билан касалхонага мурожаат қилиб, уйларига жавоб берилган.
Бундан ташқари, орадан тахминан 5 дақиқа вақт ўтиб, ҳодиса содир бўлган жойдан 300 метр орқада Қашқадарё вилояти Қамаши туманида яшовчи, 1990 йилда туғилган ҳайдовчи Э.Б. Nexia-2 русумли автомобилни «Қарши—Самарқанд» йўналишида бошқариб бораётиб Mercedes-Benz русумли юк автомобили ярим тиркамасининг орқа қисмига урилиб, йўл-транспорт ҳодисаси содир этган.
Nexia-2 ҳайдовчи Б.Э. «ўнг билак соҳасини синиши», йўловчиси Н.Х. «кўкрак қафаси ёпиқ шикастланиши, қовурға суякларининг синиши» ташхиси билан шифохонага ётқизилган.
Шуниндек, йўловчилари Қ.Б. ва Р.Ч.ларнинг енгил даражадаги тан жароҳатлари билан касалхонага мурожаат қилган ва уйларига жавоб берилган.
Ушбу йўл-транспорт ҳодисалари оқибатида ҳеч ким вафот этмаган.
Ҳозирда мазкур йўл-транспорт ҳодисаси юзасидан Самарқанд вилояти ИИБ томонидан терговга қадар текширув ҳаракатлари олиб борилмоқда.
Изоҳ (0)