Samarqandda 2019-yilda 363 milliard so‘mlik tabiiy gaz talon-toroj qilinganligi to‘g‘risida xabar bergan edik. Keyinchalik “Hududgazta’minot” aksiyadorlik jamiyati matbuot xizmati “Hududgaz Samarqand” MChJ mansabdor shaxslariga nisbatan jinoyat ishi qo‘zg‘atilib, tegishliligi bo‘yicha viloyat prokuraturasiga tergov harakatlarini o‘tkazish uchun yuborilgani to‘g‘risidagi ma’lumotni rad etdi.
“Hududgazta’minot” aksiyadorlik jamiyati asosiy vaj sifatida “Hududgaz Samarqand” MChJ 2019-yil 5-sentabr kuni tashkil etilganligi, ularning asosiy vazifasi gaz taqsimlash tarmoqlari va tegishli jihozlardan foydalanish hisoblanishini, xabardagi holatlar o‘tgan yilning yanvar oyidan oktabr oyigacha bo‘lgan davrni o‘z ichiga olganligini bayon etishgan.
MIB Samarqand viloyati boshqarmasining “Daryo”ga ma’lum qilishicha, Byuroning Samarqand viloyati boshqarmasi tomonidan 2019-yilning yanvar oyidan oktabrga qadar gaz limitidan ortiqcha olingan har bir metr kub tabiiy gaz uchun belgilangan koeffitsientlar qo‘llanilmaganligi oqibatida jami 8 milliard 651 million 258 ming 820 so‘m miqdorida to‘lovlar kam hisoblanishi, shuningdek, jami 46 ta avtomobillarga gaz to‘ldirish kompressor shoxobchalari (AGTKSh) umumiy hisobda 2.497.608 metr kub hajmdagi tabiiy gaz bilan noqonuniy ravishda ta’minlanib, o‘zganing 842 million 854 ming 500 so‘mlik juda ko‘p miqdordagi mulki rastrata yo‘li bilan talon-toroj qilinishi, shuningdek, 2019-yilning 1-noyabr holatiga iste’molchisi aniqlanmagan noreal qarzdorlikni 363 milliard 155 million 500 ming so‘m bo‘lishiga va davlat manfaatlariga juda ko‘p miqdorda zarar yetkazilishi holati aniqlangan.
Ishdagi mavjud hujjatlarga ko‘ra, ushbu jinoiy qilmishning sodir etilishi yanvar oyidan oktabr oyiga qadar davom etib kelgan bo‘lib, muqaddam faoliyat ko‘rsatgan Samarqand viloyati gaz ta’minoti davridan va hozirda faoliyat ko‘rsatayotgan “Hududgaz Samarqand” MChJ davrida ham kuzatilgan.
Mazkur gaz ta’minoti idorasining nomi, maqomi va vazifalar funksiyasi o‘zgargan taqdirda ham sodir etilgan qilmish uchun javobgarlikni istisno qilmaydi. Jinoyat Kodeksining 13-moddasi bo‘yicha qilmishning jinoiyligi va jazoga sazovorligi ana shu qilmish sodir etilgan vaqtda amalda bo‘lgan qonun bilan belgilanishi ko‘rsatilgan.
— Prezidentimizning 2017-yil 29-maydagi Farmoniga asosan, Samarqand viloyati bo‘yicha gaz ta’minoti filialining vazifalari ko‘rsatib berilgan shuningdek, ular Byuro bilan hamkorlikda plombalash, belgilangan tartibda texnik shartlarni berish, gaz tarmoqlariga yangi iste’molchilarni ulash ishlarini amalga oshirishga javobgarligi belgilab qo‘yilgan, - deyiladi MIB bayonotida. - Shuningdek, har oyda bevosita iste’molchilar tomonidan foydalanilgan energiya resurslari hajmi va tegishli hududlar chegarasidagi tarmoqlarga yetkazib berilgan hajm o‘rtasida tafovut mavjudligi haqidagi ma’lumotlarni Byuroga taqdim etish, ular asosida Byuro gaz ta’minoti korxonalari bilan birgalikda tafovutning vujudga kelish sabablarini aniqlash bo‘yicha belgilangan tartibda choralar ko‘rish vazifalari yuklatilgan. Keyinchalik, Prezidentimizning “Aholi va iqtisodiyotni energiya resurslari bilan barqaror ta’minlash, neft-gaz tarmog‘ini moliyaviy sog‘lomlashtirish va uning boshqaruv tizimini takomillashtirish chora-tadbirlari to‘g‘risida”gi Qarori asosida Samarqand viloyati bo‘yicha gaz ta’minoti hududiy filiali negizida 2019-yil 5-sentabrda “Hududgaz Samarqand” mas’uliyati cheklangan jamiyati tashkil etilib, asosiy vazifasi gaz taqsimlash tarmoqlari va tegishli jihozlardan foydalanish kabi vazifalarni o‘z ichiga olgan.
Unutmaslik kerakki, MIB viloyat boshqarmasi tomonidan yuqorida aniqlangan holatlar bo‘yicha jinoyat ishi qo‘zg‘atilishiga sababchi bo‘lgan Samarqand viloyati gaz ta’minoti korxonasining mansabdor shaxslari va boshqa barcha xodimlari hozirda “Hududgaz Samarqand” MChJda faoliyat ko‘rsatmoqda va ular o‘z vakolatiga ko‘ra, muqaddam sodir etilgan qonunbuzarliklar uchun bevosita mas’ul hisoblanadi. MIB viloyat boshqarmasi tomonidan qo‘zg‘atilgan jinoyat ishida aynan bir shaxs yoki mansabdor shaxslarning nomlari ko‘rsatilmagan. Jinoyat ishi bo‘yicha sobiq Samarqand viloyati gaz ta’minoti korxonasining yoki bo‘lmasa, “Hududgaz Samarqand” MChJ mansabdor shaxslari, ularning xatti-harakatlari aynan qaysi davrda sodir etilganligi olib borilayotgan tergov harakatlari davrida aniqlashtiriladi. Natijasi bo‘yicha jinoyat tafsilotlari batafsil ma’lum qilinadi. “Hududgazta’minot” AJning rasmiy saytlar orqali hozirda tergov harakatlari davom ettirilayotgan jinoyat ishini rad etishi esa ushbu jinoyat ishi hujjatlari bilan to‘liq tanish emasligi yoxud jinoyat va Jinoyat-protsessual kodeksining talablaridan xabardor bo‘lishi lozimligini anglatadi. Mazkur jinoyat ishi tafsilotlari hamda aybdorlarga nisbatan qo‘llanilgan choralar haqida qo‘shimcha ma’lum qilinadi, - deyilgan Majburiy ijro byurosi Samarqand viloyat boshqarmasi bayonotida.
Izoh (0)