Ijtimoiy tarmoqlarda 2020 yil 1 yanvardan boshlab so‘m plastik kartalaridagi pullar 10000:1 ga nisbatda denominatsiya qilinishi, nollar soni to‘rttaga kamayishi haqida xabarlar tarqaldi.
“Hozir muomaladagi 500, 1000, 5000, 10000, 50000 va 100000 so‘mliklar 2020-yil 31-dekabrga qadar parallel ravishda amalda bo‘ladi. Denominatsiyadan keyin 1000 so‘m 10 tiyinga, 10000 so‘m yangi 1 so‘mga teng bo‘ladi. 100 AQSh dollari 90 so‘m atrofida bo‘ladi”, — deyiladi Facebook’da tarqalgan xabarlarda.
O‘zbekiston Markaziy banki 21-dekabr kuni ushbu xabarlarga munosabat bildirdi. Unga ko‘ra, “ushbu xabarlar hech qanday asosga ega emas”. “Bugungi kunda pul birligini denominatsiya qilish masalasi O‘zbekiston hukumati va Markaziy banki tomonidan ko‘zda tutilmagan”, — deyiladi Markaziy bank axborotida.
“Kun.uz”ning eslatishicha, 2019-yil boshida qator OAVlarda prezident Mirziyoyev 100 ming so‘mlik yangi kupyurani valyutaning keyinchalik denominatsiyasi bilan chop etish to‘g‘risida ko‘rsatma bergani haqida xabarlar paydo bo‘lgan. O‘shanda Markaziy bank so‘m denominatsiyasi qilinmasligini bildirgandi.
2019-yil mart oyi boshlarida Markaziy bank raisi Mamarizo Nurmurotov milliy valyutaning denominatsiyasini o‘tkazish vazifasi qo‘yilmaganini bildirdi. Avgustda bo‘lgan matbuot anjumanida esa Nurmurotov: “Denominatsiya haqida gap ham bo‘lishi mumkin emas. Bu hech kimning xayoliga ham kelgani yo‘q”, — degandi.
Izoh (0)