Xitoyning Sian shahridagi Hi-Tech markazida o‘zbek ishbilarmonlari uchun bepul joy ajratiladi. Bu haqda O‘zbekiston Turizmni rivojlantirish davlat qo‘mitasi va Sian shahri Hi-Tech markazi vakillari uchrashuvida ma’lum qilindi.
O‘zbekiston Turizmni rivojlantirish davlat qo‘mitasi raisi Abdulaziz Oqqulov boshchiligidagi delegatsiya 10—17-dekabr kunlari Xitoyning Sian, Xanchjou va Chendu shaharlarida bo‘ldi, Xitoy rasmiy va ishbilarmon doira vakillari uchrashuvlar o‘tkazdi.
Jumladan, “Daryo” muxbiri Musulmonbek Ibrohimovning xabar berishicha, Sian Hi-Tech sanoatni rivojlantirish zonasi investitsion hamkorlik qo‘mitasi bilan bir qator kelishuvlarga erishilgan.
Sian Hi-Tech sanoatni rivojlantirish zonasi investitsion hamkorlik qo‘mitasi rahbariyati turizm, hunarmandchilik va yuqori texnologiyalar sohasida faoliyat olib boruvchi o‘zbek tadbirkorlari uchun bepul joy ajratib berishini, O‘zbekiston turizm va hunarmandchilik mahsulotlari targ‘ibotida ko‘mak ko‘rsatilishini ma’lum qildi.
Uchrashuvda shuningdek hunarmandchilik mahsulotlarini sotish mumkin bo‘lgan savdo nuqtalarini tashkil qilish hamda O‘zbekitonga investorlarni yo‘naltirish masalalari ham muhokama qilingan.
O‘zbekiston delegatsiyasi vakillari Xanchjou va Chendu shaharlarida ham bo‘lib, xitoylik sayyohlarni O‘zbekistonga jalb qilish bo‘yicha muzokaralar olib borgan. Ikki davlat tur-operatorlari o‘zaro uchrashuvlarda hamkorlik rejalarni belgilab olgan.
“Har bir taqdimotda tadbir ishtirokchilari uchun o‘zbekona palov damlanib, dasturxonga tortildi. Milliy kuy va qo‘shiqlar ijrosi yig‘ilganlarda katta taassurot qoldirdi”, — deya xabar bermoqda “Daryo” muxbiri.
Izoh (0)