The Diplomat xalqaro internet jurnali muharriri Keti Puts Twitter’dagi sahifasida O‘zbekistonda inson huquqlari bo‘yicha xorijiy veb-resurslariga kira olmayotgani haqida xabar yozib qoldirdi.
Human Rights Watch tashkilotining sobiq vakili Stiv Sverdlov esa unga javoban O‘zbekistonda inson huquqlari bo‘yicha tanqidiy veb-resurslarga (Markaziy Osiyoda Inson huquqlari assotsiatsiyasi, Inson huquqlari uchun xalqaro sheriklik, O‘zbek-German forumi, Norvegiya Helsinki qo‘mitasi) kirish imkoniyati cheklanganini bildirgan.
Prezident Administratsiyasi huzuridagi Axborot va ommaviy kommunikatsiyalar agentligi matbuot kotibi Hikmatilla Ubaydullayevning ma’lum qilishicha, ushbu holat yuzasidan agentlik mutaxassislari o‘rganish olib borgan va yuqorida tilga olingan veb-resurslarga kirishga cheklovlar mavjud emasligi aniqlagan.
“O‘zbekistonda xorijiy yangiliklar saytlari hamda inson huquqlari bo‘yicha veb-resurslarga bo‘lgan cheklovlar allaqachon bartaraf etilgan. O‘zbekistonning axborot siyosati cheklov va taqiqlarga emas, balki ochiqlikni ta’minlashga qaratilganini yana bir bor eslatib o‘tmoqchiman”, — deb ta’kidlagan Hikmatilla Ubaydullayev.
Oradan biroz vaqt o‘tib, Human Rights Watch tashkiloti sobiq vakili Stiv Sverdlov yuqoridagi saytlarni tekshirib ko‘rgani va ular ishlayotganini ma’lum qildi. Shuningdek, Keti Puts buni ko‘rishdan mamnun ekanini bildirdi. U saytlarga ertalab kirib bo‘lmagani, hozir esa buning uddasidan chiqqanini yozgan.
Izoh (0)