Greta Tunberg xalqaro bolalar mukofotini qo‘lga kiritdi

20-noyabr kuni Gaagada Xalqaro bolalar mukofotining tantanali taqdirlash marosimi o‘tkazildi. Tanlov tarixida ilk bor ikki nafar o‘smir – shvetsiyalik ekologiya faoli Greta Tunberg hamda kamerunlik huquq himoyachisi Divina Malum oliy mukofot sohibalariga aylandi. Bu haqda “TASS” xabar berdi.

Tunberg Atlantika okeani orqali AQShdan Ispaniyaga iqlim o‘zgarishlariga bag‘ishlangan BMT sammitida ishtirok etish uchun katamaranda yo‘lga chiqqani sababli 2014-yilda Nobel mukofoti laureati bo‘lgan Kaylash Satyartxi qo‘lidan mukofotni shaxsan qabul qila olmadi. BMTdagi nutqi sababli katta shov-shuv ko‘targan Greta marosim ishtirokchilariga videomurojaat yo‘llagan.

“Men uchun ushbu mukofotni qo‘lga kiritish katta sharaf. Mukofotda nafaqat mening, balki “Kelajak uchun jumalar” harakatining barcha a’zolarining hissasi katta. Quruqlikka yetib borganimda sizlarga yana o‘z tashakkurimni izhor qilishga umid bildiraman”, — deya ta’kidlagan Tunberg.

Kamerunlik 14 yoshli huquq himoyachisi Malum esa mukofotni vahshiyona jinoyatlar, urush harakatlaridan zulm ko‘rgan bolalari, umidini yo‘qotgan, yordamga muhtoj va huquqlari doimiy ravishda toptalayotgan tengdoshlariga bag‘ishladi.

“Butun Afrika va Kamerunda o‘z ovoziga ega bo‘lmagan mazlum bolalarning yagona ovozi bo‘lishda davom etishga va’da beraman”, — degan Malum.

“Bolalar huquqlari” fondi va Xalqaro dunyo bolalari mukofotining asoschisi Mark Dullaert tanlovning bu yil 15-marta o‘tkazilganiga urg‘u berib, xalqaro mukofotning yildan yilga nufuzi ortib borayotgani bolalarning dunyoni o‘zgartira olish kuchiga ega ekanligining isboti ekanligini ta’kidlagan.

“Sayyoramiz aholisining deyarli yarmini 24 yoshdan kichik bo‘lganlar tashkil etadi. Biroq ushbu qatlam deyarli o‘z ovoziga ega emas. Masalan, nima uchun dunyoning hech bir davlatidagi parlamentda 18 yoshli deputat faoliyat olib bormaydi? Yakunda ushbu qarorning hozir qabul qilinmagani kelajakdagi iqlim o‘zgarishlariga salbiy ta’sir ko‘rsatadi. Biz esa bolalarni birlashish va muammolar hamda ularning yechimi haiqda o‘z fikrini bildirishga o‘rgatayapmiz”, — deydi Dullaert.

14 yoshli Divina Malum voyaga yetmaganlarning jangari guruhlarga a’zo bo‘lishiga qarshi kurashuvchi “Dunyo bolalari tinchlik tarafdori” nomli tashkilotga asos solgan. Tashkilot Kamerunning 10 ta viloyatida o‘z vakolatxonalariga ega.