Efiopiya bosh vaziri Abiy Ahmad Ali Fransiya prezidenti Emmanuel Makrondan mamlakat harbiy havo kuchlarini kuchaytirish uchun yangi harbiy qurollar, jumladan, yadro raketalari berishni so‘ragan. Bu haqda Daily News Egypt xabar qildi.
Xabarga ko‘ra, Abiyning maktubi Fransiya davlat rahbariga iyul oyida yo‘llangan. So‘ralgan qurol-yarog‘lar ro‘yxatiga 12 ta qiruvchi samolyot (Rafale va Mirage 2000), 18 ta vertolyot, Airbus tomonidan ishlab chiqarilgan ikkita harbiy-transport samolyoti, 10 ta Dassault droni, radioelektron bosqin tizimi va 30 ga yaqin M51 yadroviy ballistik raketalari kiritilgan.
Nashrning qayd etishicha, Efiopiya bosh vazirining Fransiya hukumatidan yadro qurollari so‘rab qilgan ushbu iltimos maktubi noqonuniy harakat hisoblanadi. Ikkala davlat ham yadro qurolini tarqatmaslik haqidagi xalqaro kelishuvga a’zo bo‘lgan.
Yadro qurolini tarqatmaslik bo‘yicha kelishuv BMT ekspertlari tomonidan tayyorlangan va 1970-yilda kuchga kirgan. Ushbu xalqaro shartnomaga 190 ta mamlakat a’zo hisoblanadi.
Oktabr oyida Misr prezidenti Abdul Fattoh as-Sisi va Efiopiya hukumati rahbari Abiy Ahmad Ali Rossiyaning Sochi shahridagi uchrashuvda Nil daryosi bo‘yida qurilayotgan “Qayta tug‘ilish” to‘g‘oni qurilishini qayta boshlash bo‘yicha kelishuvga erishgan.
Izoh (0)