O‘zbekiston Sog‘liqni saqlash vazirligi pishiriqlar ichidan chiqayotgani noma’lum tabletkalar haqidagi videoga munosabat bildirildi. Videodagi ma’lumotlarga ko‘ra, bunday pishiriqlarni iste’mol qilganlar falaj bo‘lib qolayotganmish. Vazirlikdan ma’lum qilishlaricha, 15-noyabr holatiga ko‘ra shifoxonalarga yuqoridagi kabi mahsulotlar bilan zaharlanish yoki kasallik alomatlari bilan aholi tomonidan hech qanday murojaat bo‘lmagan.
O‘zbekiston Xotin-qizlar qo‘mitasi raisi Elmira Bositxonova xonanda Lolaning “Sevgingni menga ayt 2” klipini qoraladi. Uning aytishicha, Lola “atlasni masxaraboz kiyimi, ma’naviyat so‘zini esa o‘yinchoq qilib qo‘ygan”. Ijtimoiy tarmoqlarda xonandaning bu klipini ko‘pchilik qo‘llab-quvvatlayotgani, Bositxonovaning fikricha, “afsuslanarli”.
O‘zbekiston Oliy Majlisi Qonunchilik palatasiga ko‘rsatilishi kutilayotgan deputatlikka nomzodlarning mutaxassisligi, ma’lumoti va yoshi haqida ma’lumot berildi. Masalan, ularning 32 foizdan ortig‘i 40 yoshdan kichik, 41,3 foizi ayollar, 43 nafarining nomzodi qaytadan deputatlikka ko‘rsatilmoqda.
O‘zbekiston Markaziy banki bank kartalarini ogohlantirishsiz bloklanish holatlariga izoh berdi. Birinchidan, bu, Markaziy bankning fikricha, “mijozlarga xizmat ko‘rsatishdagi insofsizlik”, ikkinchidan esa Markaziy bank bank kartalarini bloklanish holatlari yuzasidan mijozlarga bir ish kunidan kechiktirmagan holda xabarnoma yuborish majburiyatini yuklagan.
Davlat bayrog‘i qabul qilingan sana — 18-noyabr munosabati bilan Toshkentda 54 ta avtobus yo‘nalishiga vaqtincha o‘zgartirish kiritiladi. Bunga tarixiy sana munosabati bilan tashkil etiladigan bayram tadbirlari sabab. Bundan tashqari, Yunusobodda metro qurilishi sabab yana bir qator avtobuslarning yo‘nalishlari 22-noyabrgacha boshqacha bo‘ladi.
Ayanchli YTHlar. Jizzaxda yuk mashinasi bilan sodir bo‘lgan YTH oqibatida Cobalt yonib ketib, ikki kishi halok bo‘ldi — qurbonlardan biri 3 yoshda. Farg‘onada ham “Kamaz” Nexia’ni urib yuborishi oqibatida ikki kishi halok bo‘ldi. “Qamchiq” dovonida esa Isuzu yuk mashinasi ag‘darilib ketdi — qurbonlar yo‘q, yaxshiyamki.
O‘zbekistonda yana nima yangiliklar? 2020-yilda ishsizlik nafaqasi ikki barobarga ko‘payadi. Dafn etish uchun nafaqa davlat budjetidan ajratiladi. Aeroportlar xususiylashtirilishi mumkin. Qashqadaryoda 7 kishi, jumladan, besh bola pomidor-bodring konservasidan zaharlandi. Toshkent chorrahalarida “vafli chiziqlari”dan so‘ng vazifasi uniki bilan bir xil bo‘lgan yana bir yo‘l chizmasi sinovdan o‘tkazilmoqda. Buxoroning Markaziy dehqon bozorida pista po‘chog‘i va sigareta qoldiqlarini belgilanmagan joyga tashlaganlar jarimaga tortildi. Tadbirkorning mulkini tortib olmoqchi bo‘lgan Farg‘ona shahar hokimligi Oliy sudda yutqazdi.
O‘zbekiston va dunyo. Turkiya IShIDning 959 a’zosini deportatsiya qiladi — ular orasida 82 nafar o‘zbekistonlik ham bor. Turkmanistonda yuzlab odamlar O‘zbekiston vizasini olish uchun navbat kutmoqda. Moskvada komaga tushgan 22 yoshli o‘zbekistonlik talaba vafot etdi. Sankt-Peterburgda o‘zbekistonlik muhojirni pichoqlagan 3 o‘smir hibsga olindi. Turkuaz egasi O‘zbekistondan 180 million dollar talab qilgan edi — Xalqaro arbitraj sudi uning 90 foiz da’vosini rad etdi.
Dunyoda nima gap? Tramp Kongressdagi impichment bo‘yicha muhokamalar tufayli amerikaliklarga murojaat qildi. AQShda o‘quvchi 16 yoshga to‘lgan kuni maktabda otishma uyushtirdi — 2 kishi halok bo‘ldi, 3 kishi jarohatlangan. Livanda sobiq moliya vaziri hukumat rahbariga aylanishi mumkin. Germaniya xorijga 7 milliard dollarlik qurol-aslaha eksport qilgan. Fransiyada zilzila tufayli Kryua atom elektr stansiyasi bir oyga to‘xtatib qo‘yildi. Venetsiyada misli ko‘rilmagan toshqinlar tufayli favqulodda holat joriy etildi. Iroqda 60 nafardan ortiq politsiya ofitseri namoyishlarda fuqarolarga nisbatan kuch ishlatgani uchun sud qilindi.
O‘qish tavsiya etiladi: Josuslikda ayblangan xalq. 14-noyabr – mesxeti turklar deportatsiya qilingan kun. Imkon bo‘lsa, yordam bering: “Davlatdan nogironlik uchun beriladigan 286 ming so‘mga yashaymiz”. Mehribonlik uyida katta bo‘lgan Furqatjon yaxshi insonlar yordamiga muhtoj.
Izoh (0)