Ўзбекистон Соғлиқни сақлаш вазирлиги пишириқлар ичидан чиқаётгани номаълум таблеткалар ҳақидаги видеога муносабат билдирилди. Видеодаги маълумотларга кўра, бундай пишириқларни истеъмол қилганлар фалаж бўлиб қолаётганмиш. Вазирликдан маълум қилишларича, 15 ноябрь ҳолатига кўра шифохоналарга юқоридаги каби маҳсулотлар билан заҳарланиш ёки касаллик аломатлари билан аҳоли томонидан ҳеч қандай мурожаат бўлмаган.
Ўзбекистон Хотин-қизлар қўмитаси раиси Элмира Боситхонова хонанда Лоланинг «Севгингни менга айт 2» клипини қоралади. Унинг айтишича, Лола «атласни масхарабоз кийими, маънавият сўзини эса ўйинчоқ қилиб қўйган». Ижтимоий тармоқларда хонанданинг бу клипини кўпчилик қўллаб-қувватлаётгани, Боситхонованинг фикрича, «афсусланарли».
Ўзбекистон Олий Мажлиси Қонунчилик палатасига кўрсатилиши кутилаётган депутатликка номзодларнинг мутахассислиги, маълумоти ва ёши ҳақида маълумот берилди. Масалан, уларнинг 32 фоиздан ортиғи 40 ёшдан кичик, 41,3 фоизи аёллар, 43 нафарининг номзоди қайтадан депутатликка кўрсатилмоқда.
Ўзбекистон Марказий банки банк карталарини огоҳлантиришсиз блокланиш ҳолатларига изоҳ берди. Биринчидан, бу, Марказий банкнинг фикрича, «мижозларга хизмат кўрсатишдаги инсофсизлик», иккинчидан эса Марказий банк банк карталарини блокланиш ҳолатлари юзасидан мижозларга бир иш кунидан кечиктирмаган ҳолда хабарнома юбориш мажбуриятини юклаган.
Давлат байроғи қабул қилинган сана — 18 ноябрь муносабати билан Тошкентда 54 та автобус йўналишига вақтинча ўзгартириш киритилади. Бунга тарихий сана муносабати билан ташкил этиладиган байрам тадбирлари сабаб. Бундан ташқари, Юнусободда метро қурилиши сабаб яна бир қатор автобусларнинг йўналишлари 22 ноябргача бошқача бўлади.
Аянчли ЙТҲлар. Жиззахда юк машинаси билан содир бўлган ЙТҲ оқибатида Cobalt ёниб кетиб, икки киши ҳалок бўлди — қурбонлардан бири 3 ёшда. Фарғонада ҳам «Камаз» Nexia’ни уриб юбориши оқибатида икки киши ҳалок бўлди. «Қамчиқ» довонида эса Isuzu юк машинаси ағдарилиб кетди — қурбонлар йўқ, яхшиямки.
Ўзбекистонда яна нима янгиликлар? 2020 йилда ишсизлик нафақаси икки баробарга кўпаяди. Дафн этиш учун нафақа давлат бюджетидан ажратилади. Аэропортлар хусусийлаштирилиши мумкин. Қашқадарёда 7 киши, жумладан, беш бола помидор-бодринг консервасидан заҳарланди. Тошкент чорраҳаларида «вафли чизиқлари»дан сўнг вазифаси уники билан бир хил бўлган яна бир йўл чизмаси синовдан ўтказилмоқда. Бухоронинг Марказий деҳқон бозорида писта пўчоғи ва сигарета қолдиқларини белгиланмаган жойга ташлаганлар жаримага тортилди. Тадбиркорнинг мулкини тортиб олмоқчи бўлган Фарғона шаҳар ҳокимлиги Олий судда ютқазди.
Ўзбекистон ва дунё. Туркия ИШИДнинг 959 аъзосини депортация қилади — улар орасида 82 нафар ўзбекистонлик ҳам бор. Туркманистонда юзлаб одамлар Ўзбекистон визасини олиш учун навбат кутмоқда. Москвада комага тушган 22 ёшли ўзбекистонлик талаба вафот этди. Санкт-Петербургда ўзбекистонлик муҳожирни пичоқлаган 3 ўсмир ҳибсга олинди. Туркуаз эгаси Ўзбекистондан 180 миллион доллар талаб қилган эди — Халқаро арбитраж суди унинг 90 фоиз даъвосини рад этди.
Дунёда нима гап? Трамп Конгрессдаги импичмент бўйича муҳокамалар туфайли америкаликларга мурожаат қилди. АҚШда ўқувчи 16 ёшга тўлган куни мактабда отишма уюштирди — 2 киши ҳалок бўлди, 3 киши жароҳатланган. Ливанда собиқ молия вазири ҳукумат раҳбарига айланиши мумкин. Германия хорижга 7 миллиард долларлик қурол-аслаҳа экспорт қилган. Францияда зилзила туфайли Крюа атом электр станцияси бир ойга тўхтатиб қўйилди. Венецияда мисли кўрилмаган тошқинлар туфайли фавқулодда ҳолат жорий этилди. Ироқда 60 нафардан ортиқ полиция офицери намойишларда фуқароларга нисбатан куч ишлатгани учун суд қилинди.
Ўқиш тавсия этилади: Жосусликда айбланган халқ. 14 ноябрь – месхети турклар депортация қилинган кун. Имкон бўлса, ёрдам беринг: «Давлатдан ногиронлик учун бериладиган 286 минг сўмга яшаймиз». Меҳрибонлик уйида катта бўлган Фурқатжон яхши инсонлар ёрдамига муҳтож.
Изоҳ (0)