Joriy yilning 11-noyabr kuni Farg‘ona shahar hokimligi matbuot xizmati “Oliy sudgacha yugurtirilgan tadbirkorlar. Farg‘ona shahar hokimligi nega mulkni tortib olmoqchi bo‘ldi?” sarlavhasi ostida maqolaga munosabat bildirgani haqida xabar berilgan edi.
“ ‘Constant Trading’ qo‘shma korxonasi o‘z faoliyatini yo‘lga qo‘yishda yana bir qonunbuzarlik holatiga yo‘l qo‘ygan. Farg‘ona viloyati ekologiya va atrof-muhitni muhofaza qilish boshqarmasining bizga ma’lum qilishicha, korxona davlat ekologik ekspertizasi xulosasini olmay turib faoliyat olib borgan. ‘Ekologik ekspertiza to‘g‘risida’gi qonunining 21-moddasiga muvofiq, davlat ekologik ekspertizasining xulosasi davlat ekologik ekspertizasi obyektini moliyalash va ro‘yobga chiqarishda yuridik va jismoniy shaxslar tomonidan ijro etilishi majburiydir. Davlat ekologik ekspertizasining ijobiy xulosasi bo‘lmay turib, loyihalarning bank va boshqa kredit tashkilotlari tomonidan moliyalanishi, shuningdek, ularning ro‘yobga chiqarilishi taqiqlanadi”— deyiladi Farg‘ona shahar hokimligi munosabatida.
“Constant Trading” MChJ shaklidagi qo‘shma korxonasi “Daryo”ga murojaat qilib, Farg‘ona shahar hokimligi bildirgan rasmiy bayonotda bir nechta tekshirilmagan faktlar mavjudlgini ma’lum qildi.
Xususan, yuqorida ko‘rsatilgan holatga “Constant Trading” qo‘shma korxonasi quyidagicha munosabat bildiradi:
“Hozirgi vaqtda import qilib olib kelingan asbob-uskunalari montaj qilinishi hamda ishga tushirilishga tayyorlanishi kerak. Shundan so‘ng qoidaga ko‘ra barcha tegishli, xususan ekologik, normativ va boshqa ruxsatnomalar olish harakatlari boshlanadi”.
O‘zbekiston Respublikasi Oliy sudi Ma’muriy ishlar bo‘yicha sudlov hay’atining (I.Alimov, Sh.Axatova va M.Eshimbetov) joriy yil 1-noyabrdagi ajrimi bilan “Constant Trading” MChJning nazorat tartibidagi shikoyati qanoatlantirilib, Farg‘ona shahar ma’muriy sudining 2019-yil 18-iyuldagi hal qiluv qarori va viloyat ma’muriy sudi apellyatsiya instansiyasining 2019-yil 29-avgustdagi qarori bekor qilindi va shahar hokimligining arizasini rad etish to‘g‘risida yangi qaror chiqarildi.
Biroq Farg‘ona shahar hokimligi ushbu masala yuzasidan o‘z nuqtayi nazari qat’iy ekanligini bildirgan.
“Bu esa Farg‘ona viloyati mansabdor shaxslarining qonunga rioya qilishdan bosh tortayotgani va xorijiy investitsiya ulushiga ega bo‘lgan korxonalarning ko‘chmas mulkini har qanday yo‘l bilan egallash maqsadidan dalolat beradi”, — deyiladi “Constant Trading” bayonotida.
Farg‘ona shahar hokimligi munosabatida “Constant Trading” qo‘shma korxonasi tomonidan 2018-yildan 2019-yil noyabr oyigacha umuman mahsulot eksportini amalga oshirmagani aytiladi. Ushbu holatga “Constant Trading” quyidagicha izoh bergan:
“Korxonamiz tomonidan 2018-yildan 2019-yil noyabr oyigacha umuman mahsulot eksport qilinmaganiga kelsak, rekonstruksiya va qurilish-montaj ishlari vaqtida mahsulot eksporti haqida hech qanday gap bo‘lishi mumkin emas. Biz bu davrda ishlab chiqarishni qayta ixtisoslashtirish bilan faol shug‘ullanib kelganmiz, bu esa to‘siqlar yaratuvchi Farg‘ona hokimligiga xush kelmadi. 2019-yilning iyul—oktabr oylarida korxonamiz investitsiya loyihasi bo‘yicha texnologik uskunalarni import qildi”.
Izoh (0)