Boshqa hamkasblariga qaraganda tezda mashhurlikka erishgan xonanda Yorqinxo‘ja Umarov 33 yoshni qarshiladi. Shu munosabat bilan uning hayoti va ijodiy faoliyatiga nazar solamiz.
Turmush o‘rtog‘i vafotini sezgan Zohida Umarova
Yosh xonanda Yorqinxo‘ja Umarovning onasi Zohida Umarova ham bir paytlar san’atkor bo‘lgan. Ammo turmush o‘rtog‘ining vafoti sabab san’atdan ketishga qaror qilgan. O‘g‘li Yorqinxo‘ja Umarov esa onasining armonlarini ro‘yobga chiqarishga ahd qilgan.
— 1998-yilning 8-sentabr kuni tushdan keyin qattiq shamol bo‘ldi. Men oshxonada dadamiz yaxshi ko‘radigan baqlajonli ikra tayyorlayotgandim. Birdan ko‘tarilgan kuchli shamol hamma yerni alg‘ov-dalg‘ov qilib yubordi. Qaynonamga qarab “Yaxshi odam o‘ldi, shekilli”, dedim. Qaynonam gapimga hayron bo‘ldi. “Sentabrda bunday shamol bo‘lmasdi-da”, dedim. Yorqinxo‘ja 5 yoshda edi, bog‘chaga ketgandi.
Oradan ko‘p vaqt o‘tmay, dadamiz avtohalokatga uchrab vafot etgani haqida xabar keldi. Bir zumda uyimizga tumonat odam to‘plandi. Farzandlarim u paytda ancha yosh edi, ular otasining vafot etganini bilgani ham yo‘q. Men esa ko‘p o‘tmay yolg‘iz ayolga qanchalar qiyin bo‘lishini anglaganman. Turmush o‘rtog‘im vafot etgan kundan mening baxtsizlik davrim boshlangan.
Eng alam qiladigani — yolg‘iz ayolga boshqacha munosabatda bo‘lishadi. Hatto qarindosh-urug‘larning ham munosabati o‘zgardi. Hatto erlarini qizg‘anadiganlar ham bo‘ldi. “Bu san’atkor-da”, deb yovqarash qilganlarni-ku gapirmasa ham bo‘ladi. Farzandlarimni birovdan kam qilmaslik uchun hayotda ikki rolni o‘ynadim. Ya’ni ular uchun ham ona, ham ota bo‘ldim, deydi Zohida Umarova.
“Tanaffus paytida yo‘qolib qolardim”
Yorqinxo‘ja Umarovga otasining yo‘qligi har qadamda sezilardi. Boisi, kichik oila ko‘plab moddiy qiyinchiliklarga uchrar, onasi san’atdan ketganidan so‘ng oilaning tirikchilik manbasi ham uzilgandi.
— Onamdan biron marta pul so‘ragan bola emasdim. Bersa olardim, bermasa pulim yo‘qligini aytmasdim. Tanaffus payti yaqinlashishi bilan “yo‘qolib” qolishga harakat qilardim. Chunki sinfdoshlarim oshxonaga borib nimadir xarid qilishardi. Hatto ularga ham pulim yo‘qligini bildirishni istamasdim. Juda ko‘p moliyaviy qiyinchilikka uchraganmiz, shu bois 4-sinfimdan boshlab ishlashga qaror qilganman. O‘sha paytlarda simyog‘och va ko‘p qavatli uy eshiklariga e’lonlar yopishtirilardi. Men ham shunday ishga joylashib, pul ishlaganman. Piyoda yuraverib oyoqlarim og‘rib ketardi, deydi xonanda.
“Ichki ishlar xodimi bo‘lishni istamadim”
Zohida Umarova san’atkor bo‘lsa-da, o‘g‘lining ham shu kasbni egallashini istamaydi. U Yorqinxo‘ja otasi kabi ichki ishlar xodimi bo‘lishini orzu qilardi.
— Onam ichki ishlar xodimi bo‘lishim uchun rosa harakat qilgan. Avvaliga onamning qarori to‘g‘ridir deb bilganman, ammo baribir ichki xohishimga qarshi chiqolmaganman, deydi xonanda Yorqinxo‘ja Umarov.
“Rus va ingliz tilini bilaman”
Xonanda xorij tillaridagi qo‘shiqlarni ham ijro etadi. U xorij tillarini biladimi?
— Bolaligimda o‘zbek maktabda o‘qiganman, ammo rus millatiga mansub do‘stlarim ko‘p bo‘lgan. Keyin institutning rus guruhida o‘qidim. Bolalikdan esa ingliz tilini o‘rganishga harakat qilganman. Hozirgi kunda rus va ingliz tillarida erkin muloqot qila olaman, deydi xonanda Yorqinxo‘ja Umarov.
“ The cover up da ishtirok etishni istamagandim”
The cover up loyihasi g‘olibi bo‘lgan Yorqinxo‘ja Umarov aslida unda ishtirok etishni istamagani haqida so‘zlab berdi.
— “Sulola” jamoasini tashkil etilgandan keyin xorijda, xususan, Xitoyda o‘tkaziladigan festivallar haqida ma’lumot to‘plashni boshlaganman. “Xorij festivallarida tajriba orttirib qaytamiz”, deb niyat qilgandim. Ammo jamoamiz a’zosi Nodir aka The cover up loyihasi haqida eshitib, unda qatnashishni taklif qilgan. “Nima keragi bor, ketaylik”, deganman. Xullas, u bir amallab ko‘ndirgan va ilk ko‘rsatuvdan keyin qiziqishim kuchayib ketgan. Keyin faqat g‘olib bo‘lish fikri bilan yashaganman, deydi xonanda Yorqinxo‘ja Umarov.
Madaniyat vaziriga kuyov bo‘lgan Yorqinxo‘ja
2023-yilning 19-sentabr kuni 31 yoshida Yorqinxo‘ja Umarov O‘zbekiston madaniyat vaziri Ozodbek Nazarbekovning 17 yoshli uchinchi qizi Zinnuraga uylandi. Yorqinxo‘ja kelinnikiga yo‘l olishdan avval onasi Zohida Umarovaga maxsus taklifnoma hamda tilla zanjir sovg‘a qildi.
Ikki yoshning visol oqshomi poytaxtdagi restoranlardan birida bo‘lib o‘tdi. Tantanaga Dilnoza Kubayeva, Rixsitilla Abdullayev, Zara Shirinova, Jamshid Umrzoqov va Davron Kabulovlar boshlovchilik qildi. Yorqinxo‘janing onasi Zohida Umarova kelgan barcha mehmonlarga minnatdorlik bildirib, shou-biznes vakillariga o‘g‘lini yolg‘izlatib qo‘ymagani uchun alohida tashakkurini izhor etdi. Yorqinxo‘janing o‘zi O‘zbekiston xalq artisti G‘ulomjon Yoqubov bilan duet kuyladi.
— Men Yorqinxo‘ja bilan Zinnuradan alohida yashayman. Kelinimning onasi Nazokatxon har kuni qo‘ng‘iroq qilib, “Zohida opa, oldilarida bo‘ling”, deydi. Ular bir-biriga juda yaxshi o‘rganyapti, ertaga farzandli bo‘lsa, yoshlarning orasi ozgina qochadi. Farzandli bo‘lguncha bir-biriga to‘ysin, deyman. Zinnura 17 yoshda turmushga chiqdi, o‘g‘lim bilan oralari 14 yosh. Ozodbekka rahmat, yoshgina qizini Yorqinxo‘jaga ishondi.
Yorqinxo‘ja kelinimni to‘ygacha ko‘rmagan-ku, shunday deb qoldi: “Ayajon, ko‘rish shart emas ekan. Aqli, farosati bo‘lsa bo‘ldi ekan. Bu mening komplekt muhabbatim”, deydi. Kelinim ham islom dinini sof qabul qilib, o‘g‘limga nikohgacha o‘zini ko‘rsatmaganiga rahmat, degan edi Zohida Umarova to‘ydan keyin bergan intervyusida.
Juftlik o‘tgan yilning 15-iyun kuni o‘g‘il farzandli bo‘ldi.
Yorqinxo‘ja nimadan qo‘rqadi?
Xonandaning fobiyasi bormi? U nimadan ko‘proq qo‘rqishi haqida ham aytib o‘tgan.
— Yoshligimda tomga chiqqanimda baland panjarali joy turgan ekan. Balandlikdan yaxshigina qo‘rqqanman. Nima sababdan bundan qo‘rqishimni bilmayman, balandlikdan pastga qaragan paytim yuragim orqaga tortib ketadi, deydi xonanda.
Izoh (0)