Saudiya Arabistonida tashqi ishlar vaziri ishdan ketdi. Uning o‘rnini shahzoda Feysal bin Farhon al-Saud egalladi

Saudiya Arabistoni tashqi ishlar vaziri Ibrohim al-Assaf egallab turgan lavozimidan ozod qilindi, deb xabar bermoqda “Interfaks”.

Ibrohim al-Assaf 2018-yil dekabr oyidan buyon Tashqi ishlar vazirligida rahbar lavozimida ishlab kelayotgandi. Bunga qadar u Qirollikda moliya vaziri sifatida ishlagan.

Ibrohim al-Assaf o‘rnini Saudiya Arabistoni qiroli Salmon bin Abdul Aziz al- Saudning farmoniga ko‘ra shahzoda Feysal bin Farhan al-Saud egallagan.

“Shahzoda Feysal bin Farhon bin Abdul Aziz al-Saud qirolning farmoni asosida tashqi ishlar vaziri lavozimiga tayinlandi”, — deyilgan SPA agentligi tarqatgan xabarda.

Agentlik ma’lumotiga ko‘ra, avvalgi tashqi ishlar vaziri Ibrohim al-Assaf davlat vaziri lavozimiga tayinlangan.

Avval Ibrohim al-Assaf Eronning Saudiya Arabistonidagi katta neft obyektlarini vayron qilgan hujum raketalari eronlik mutaxassislar tomonidan ishlab chiqarilganligini bildirgandi.