Qirg‘iziston prezidenti Sooranbay Jeenbekov Yaponiyaga qilgan xizmat safari vaqtida Toshiba Energy Systems and Solutions zavodiga tashrif buyurgan va u yerda Toshiba korporatsiyasi prezidenti Satoshi Sunakava bilan uchrashgan. Bu haqda Qirg‘iziston prezidentining matbuot xizmati xabar qildi.
Qirg‘iziston prezidenti kompaniya rahbari bilan muloqot chog‘ida respublikada Yaponiya korporatsiyasi bilan hamkorlikda infratuzilma obyektlari, jumladan, gidroenergetika loyihalarini amalga oshirishni muhokama qildi. Shuningdek, Toshiba rahbariga Qirg‘iziston hududida GES qurishni taklif etdi.
O‘z navbatida Satoshi Sunakava Jeenbekovga gidroelektrostansiyalar, issiqlik va atom elektrostansiyalari uchun ishlab chiqarilayotgan xomashyo haqida ma’lumot bergan.
Shuningdek, yapon kompaniyasi rahbari Qirg‘izistonning energiya resurslariga boy mamlakat ekanligini qayd etib, bu yerda 80 foiz energiya gidroelektrostansiyalarda ishlab chiqarilishidan xabardor ekanligini bildirgan.
Sunakava Toshiba kompaniyasining Qirg‘izistonda to‘rt yo‘nalish bo‘yicha faoliyat olib borishini rejalashtirgani va ulardan biri aynan gidroenergetika sohasiga aloqadorligini aytib o‘tgan.
Izoh (0)