Turkiya elchisi Pompeoning AQShning urushga tayyorgarligi haqidagi gaplariga munosabat bildirdi

Turkiyaning O‘zbekistondagi favqulodda va muxtor elchisi Mehmet Sureyya Er AQSh davlat kotibi Mayk Pompeoning Vashingtonning Anqara bilan urushga tayyorligi haqida bildirgan bayonoti xato aytilgan so‘zlar ekanligini bildirdi.

Men buni inson faktori sabab yuz bergan xato deb hisoblayman. Tarjimada yo‘l qo‘yilgan odatiy xatolardan biri. Yuqori martabali davlat amaldori bunday mas’uliyatsiz bayonot berishiga ishonmayman. Biz diplomatlar uchun og‘zaki gap-so‘zlardan yozma protokol yozishmalari muhimroq.

Mehmet Sureyya Er, elchi

22-oktabr kuni AQSh davlat kotibi Mayk Pompeo CNBC telekanalida mamlakat prezidenti Donald Trampning zarurat paydo bo‘lsa Turkiya bilan urushga tayyorligini, lekin Vashingtonning urushdan ko‘ra tinchlikni afzal bilishini qayd etgandi.

9-oktabrda Turkiya prezidenti Rajab Toyyib Erdo‘g‘on Suriya shimoli-sharqida “Suriya demokratik kuchlari”, Kurdiston ishchi partiyasi jangarilari hamda IShID terrorchilariga qarshi “Tinchlik bulog‘i” operatsiyasini boshlagan. AQSh ushbu harbiy harakatlarni qoralagan va operatsiya boshlanganidan keyin ularda ishtirok etmasligi, Suriya hududidagi qo‘shinini olib chiqib ketishini ma’lum qilgan.

17-oktabrda Turkiya prezidenti Rajab Toyyib Erdo‘g‘on hamda AQSh vitse-prezidenti Mayk Pens o‘rtasidagi muzokaralardan keyin Anqara Suriyadagi harbiy operatsiyani to‘xtatgan va kurdlarning chegara hududidan uzoqlashishi uchun 120 soat davomida o‘t ochmaslik shartiga rozi bo‘lgan.22-oktabrda Rossiya prezidenti Vladimir Putin va Turkiya davlat rahbari Rajab Toyyib Erdo‘g‘on o‘rtasida olti yarim soat davomida Suriya shimoli-sharqidagi vaziyat o‘zaro muhokama qilindi va chegara hududida rus-turk qo‘shma patrul tadbirlarini o‘tkazish to‘g‘risida memorandum imzolandi. Unga ko‘ra, “Tinchlik bulog‘i” operatsiyasida yana 150 soatlik tanaffus e’lon qilingan.Ushbu vaqt poyoniga yetgach, Rossiya harbiy politsiyasi va Turkiya qo‘shini Suriya chegarasida patrul tadbirlari o‘tkazadi. Ikki davlat qochoqlar uchun “xavfsiz zona” tashkil etishda hamkorlik hamda Adana xalqaro shartnomasi shartlariga amal qilishni ham kelishib olgan.